這齣片海洋大集合(Finding Nemo)是皮克斯公司(Pixar animation studio)佇2003年出的第五齣片，這齣是予𨑨迌物大集合(Toy story)、蟲的危機(A bug’s life)閣有魔神仔電力公司(Monster Inc)的編劇安得呂斯丹頓(Andrew Stanton)所導的。這齣片早佇1992年著開始咧構想啊！做十偌年。
這齣片的拄開始，有兩隻小丑仔魚，一隻叫馬林(Marlim)；一隻叫珊瑚(Coral)，這兩隻魚仔是翁某，有幾若的囡仔攏已經去予珊瑚放卵落來但猶未出世，兩隻魚仔著咧討論欲為囡仔號啥物名，珊瑚著想著一個名，叫尼摩(Nemo)。無偌久，有一隻加馬斯魚來啊！珊瑚踮遐咧躊躇，馬林著共講：「咱卡緊覕佇間仔內，囡仔𣍐出代誌。」毋過珊瑚猶是決定泅去保護囡仔。正害，珊瑚到尾仔和一陣囡仔去予彼隻魚食去啊！馬林艱苦甲𣍐使。後來，伊看著賰一粒卵佇遐，伊著提彼粒，對伊講：「好，免驚，爸爸佇遮，爸爸揣著你啊！我保證，一切攏順利。尼摩！」尼摩出世以後，有一工早起，心內足暢，講：「讀冊的第一工！讀冊的第一工！」伊爸爸馬林著𤆬伊去學校，到佇學校的時，蝶仔魚、海馬及雨傘打可三隻魚看著馬林，著共講：「你是小丑仔魚？按呢你一定𠢕激五仁。敢會使請你來講笑詼？」馬林雖然對亻因講，毋過講甲𣍐輾轉。後來，魴魚阿黎老師(Mr. Ray)來啊！欲𤆬學生去探索。亻因離開了後，馬林著繼續及彼三隻魚開講，結果亻因講著彼陣囡仔欲去坑崁，馬林心內著緊張甲去逐。好佳哉馬林逐著亻因，拄仔好尼摩咧和頭拄仔馬林咧開講的彼三隻魚的囡仔咧比賽誰會當泅去船附近。馬林著來共尼摩講：「行，咱來轉去，明年接閣轉來讀冊。」尼摩著對伊爸爸講：「我討厭你。」然後馬林揣阿黎老師參詳的時，尼摩真正泅去摸船底，馬林著大聲喝：「不准摸彼個物件，馬上共我轉來。對，著是按呢，你麻煩大啊！」然後藏水沬的人拄仔好出來，著共尼摩掠去，閣對馬林用爍光燈翕相，馬林因為頭拄仔彼爍光燈，目睭著霧霧，𣍐赴逐船，所以伊著趕緊去討救兵。有一隻南洋剝魚多莉(Dory)無張持去挵著馬林，來共回失禮，馬林順紲問伊敢知影船佇叨，彼隻魚講伊知，請馬林綴伊行。毋過泅到一半，多莉著對馬林講：「你咧創啥？莫一直綴我好無？」馬林著共講：「妳毋是講妳知影船向叨位駛？若是咧滾笑，一點仔攏𣍐好笑。」多莉著共講：「歹勢啦！歹勢啦！我有小可仔著健忘症。」馬林規氣家己去揣，拄離開的時，拄著鯊魚富呂斯(Bruce)，富呂斯著堅持這兩隻魚仔來聚會。富呂斯有兩個鯊魚兄弟，一隻叫阿沈(Chum)；一隻叫安可(Anchor)。三隻鯊魚佇聚會進前做伙宣告：「魚是來做朋友，毋是做來食的。」然後亻因請馬林講笑詼，毋過馬林拄仔好看著頭拄仔掠尼摩的人的水目鏡，著去提來看覓，但是及多莉搶，無張持拍著多莉，因為多莉出血的芳味去予富呂斯鼻著，富呂斯著擋𣍐牢欲食亻因，馬林及多莉著覕佇砲仔空內，毋過因為富呂斯挵彼空，內底的砲著飛出去，然後碰著海底炸彈，炸彈著爆炸。鏡頭來到一間齒科診所，尼摩去予人擲入去水族箱，內底有鱸魚卒仔囝(Gurgle)、刺䲅伯路得(Bloat)、海星阿桃(Peach)、黃唐魚阿泡(Bubbles)、烏尾宅泥魚阿漂(Deb)閣有蝦仔阿傑(Jacque)攏出來對尼摩自我介紹。無偌久，有一隻皮利歁鳥仔尼哥(Nigel)飛來到診所的窗仔邊及水族箱的魚開講，因為亻因足愛看醫生挽人的喙齒。後來醫生共尼哥趕走了後，著提伊的外甥女仔打拉(Darla)的相片對尼摩講：「拜五你新的主人欲來𤆬你轉去啊喔！」水族箱的魚著講：「彼查某囡仔足𠢕烏白搖魚。」尼摩驚甲欲死，講：「我無愛及伊轉去，我欲轉去揣爸爸。」無張持，尼摩去予過濾器的管仔吸牢，逐家著趕緊去救伊，彼時，注挪鰨鰣阿吉仔(Gill)泅出來講：「莫共鬥相共，請逐家莫共鬥相共。」尼摩著講：「敢會使救我？」阿吉仔講：「𣍐使，你害家己去予㧎著，一定有法度救你家己。」尼摩閣講：「但是我的鰭著傷啊！」阿吉仔閣講：「對我來講是小事。」尼摩看著伊身軀頂嘛有著傷，伊著骨力將伊家己脫離危險。脫離以後，逐家著噗仔聲共鼓勵，然後決定暗時來聚會。鏡頭倒轉去海洋，馬林及多莉佇鯊魚離開了後，小眯一下，拄睏醒，亻因所睏的彼臺破船煞落落來，好佳哉亻因無代誌，但是水目鏡落落去足深的所在，所以亻因兩隻魚仔著泅落去揣。佇足深的所在，拄著一隻電火魚，亻因著趕緊旋，但拄仔好揣著水目鏡，馬林著請識字的多莉共彼頂面所寫的地址讀出來，按呢亻因才知影欲按怎揣尼摩，頂面寫「瑟尼皮雪曼瓦羅比路42號(P.SHERMAN 42 WALLABY WAY SYDNEY)」。好佳哉多莉不但讀會出字，閣有法度記牢牢，這算講伊第一擺會當佇健忘症中記憶尚好的一概。鏡頭倒轉來齒科診所，水族箱欲來開會，阿吉仔欲考驗尼摩敢會當泅過強水流，尼摩順利成功了後，阿吉仔著決定及尼摩參詳，亻因逐家為著欲離開水族箱，著請尼摩佇隔轉工泅入去過濾器內將電風用石頭㧎牢，予水族箱的水垃圾，按呢亻因著會使趁醫生來換水將亻因囥佇袋仔內的時，偷偷仔離開。尼摩著答應啊！鏡頭倒轉去海洋，馬林著問一陣魚仔瑟尼欲按怎行，亻因講：「請順東澳洋流行。」亻因解釋了後，馬林拄走，亻因閣對多莉講：「請恁特別注意，若拄著山谷請迵過莫迒過。」然後馬林及多莉兩隻魚仔拄著山谷，煞迒過去，因為東澳洋流著佇頂面，但佇彼時才知影是按怎毋通迒過山谷，因為頂懸有幾若隻䖳。毋過這兩隻魚仔著佇䖳的頭頂跳來跳去，所以馬林著決定及多莉比賽啥人會當代先離開這陣䖳，結果馬林第一名，但是多莉走去叨？伊去予䖳電著啊！馬林著去救伊，救的路中嘛一直去予電，所以兩隻魚仔攏昏去。鏡頭倒轉來齒科診所，阿吉仔著趁醫生去便所的時，叫尼摩泅入去過濾器內用石頭將電風㧎牢，但真可惜，尼摩當對管仔泅出來的時，電風閣開始振動啊！尼摩去予吸入去，阿吉仔著馬上提草仔枝將伊救出來，尼摩差一點仔無命，阿桃著講：「阿吉仔，莫閣叫伊去啊！」鏡頭倒轉去海洋，馬林一醒，看著一隻海龜阿龜(Crush)對馬林講：「兄弟啊！恁頭拄仔按呢，阮著按呢，然後恁著按呢。」馬林講：「你是咧講啥？敢會使請你共我講東澳洋流佇叨？」阿龜著笑講：「著佇你遮啊！」馬林才知影原來伊已經佇洋流頂啊！阿龜問伊按怎來，馬林突然間想著多莉，心內足緊張去揣多莉，看著多莉的鰭去予䖳電著傷啊！心內感覺對伊正失禮。多莉醒起來了後，著和一陣細隻海龜耍，馬林嘛參一跤。耍了多莉著講：「進前到底發生啥物代誌我攏𣍐記得啊！」所以馬林著共逐家講：「我的囝尼摩去予人類掠去啊！我當初若無對伊遮爾仔嚴，伊應該會聽我的話……」馬林所分享予逐家的消息攏傳出去啊！傳到尼哥遐，尼哥著馬上飛去齒科診所共尼摩報告消息，尼摩一聽著伊爸爸當欲來揣伊，伊馬上閣泅入去過濾器內將電風㧎牢，水族箱內的魚攏驚甲欲死，想𣍐到這擺成功啊！鏡頭倒轉去海洋，馬林及多莉對東澳洋流下交流道以後，順紲問阿龜幾歲，阿龜回答：「一百五十歲，猶足少年。」因為尼摩想欲知影海龜會當活偌久。然後亻因繼續向前行，但彼所在霧霧，多莉著去問路，結果亻因去予一隻海翁食去。鏡頭倒轉去齒科診所，水族箱愈來愈垃圾，亻因心內足期待醫生來換水。醫生來啊！看著水足垃圾，著決定欲清水族箱。鏡頭倒轉去海洋，馬林及多莉敢真正去予海翁食去？無亻因佇海翁的喙內，多莉著用海翁語言來及海翁講話，後來海翁的喙舌攑起來，多莉講：「海翁叫咱愛放手，一切攏會順利。」然後兩隻魚向伊的腹肚落去，結果對海翁的尻脊骿噴出來，馬林才知影伊是欲𤆬亻因去瑟尼。隔轉工早起，有一隻皮利歁鳥仔共亻因食落去，馬林及多莉窒佇鳥仔的頷頸仔，馬林踅踅唸，講：「我對遮遠的所在來毋是欲予你做早頓食。」彼隻皮利歁鳥仔著去予哽著，尼哥看著伊吞的是馬林及多莉，著馬上叫伊吐出來。馬林及多莉走的路中，拄著幾若隻海鳥，海鳥看著亻因，著一直講：「我的！我的！我的！……」因為亻因看著不管是魚仔抑是蝦仔等等，只要是食的亻因著攏足愛搶。尼哥著共彼兩隻魚仔囥佇伊的喙，然後載亻因去揣尼摩。鏡頭閣轉來齒科診所，水族箱突然間變甲足清氣，因為醫生趁亻因咧睏的時換過濾器，拄仔好打拉來啊！醫生著將尼摩囥佇袋仔內，好佳哉尼哥紮馬林及多莉趕來阻止打拉搖袋仔，然後尼摩對排水管落去，因為所有的排水管攏通到大海。尼哥著將馬林及多莉送轉去海洋，心內僥倖離開。馬林感覺尼摩死啊！著家己泅轉去厝。後來尼摩經過水管來到海洋，拄仔好拄著心內艱苦的多莉，著問伊爸爸佇叨，尼摩順紲自我介紹，多莉毋知伊是誰，嘛毋知伊揣的人是誰，後來看著水管頂寫「瑟尼」，才知影一切的代誌，所以著去問路。尼摩及多莉佇魚場揣著馬林，馬林著足歡喜。佇彼霎，有罾將幾若隻魚罟起來，多莉拄仔好嘛去予罟著，尼摩為著欲救伊，著請伊爸爸來指揮所有的魚向下跤泅。正厲害，所有的魚加起來的氣力真正比漁船的掠魚機卡強。結果尼摩昏去啊！馬林對伊講：「好，免驚，爸爸佇遮，爸爸揣著你啊！」尼摩醒起來，著共伊爸爸講：「爸爸，我愛你。」隔轉工早起，尼摩欲去上課啊！馬林到學校，閣對蝶仔魚、海馬及雨傘打可三隻魚練痟話，泅過歸個海洋的伊，這擺講甲足輾轉，三隻魚著笑甲擋𣍐牢。尼摩著綴阿黎老師去上課，路中，請老師小停一下，伊倒轉去及伊爸爸講：「爸爸，我愛你。」馬林心內足歡喜，然後放心放囡仔去上課。啊阿吉仔遐後來發生啥物代誌？亻因閣將水族箱用予垃圾，然後趁醫生共亻因囥佇袋仔內的時，偷偷仔溜去海港。
各位觀眾朋友，這猶無算煞，因為聽講2016年閣欲出第二集(Finding Dory)，請逐家期待。
留言列表
