這齣甭格電影是咧講有關咱細漢的時陣所耍的𨑨迌物，這是用會曉講話閣家己活動的𨑨迌物來予咱知影亻因的生活。佇電影內面只要人類若無佇咧的時，這陣𨑨迌物著會起來活動、開講等等。反過來講，若人類出現，遮的𨑨迌物著愛倒轉去原本的位而且嘛愛倒轉去原本的姿勢。這系列的電影目前總共有三集。第一集(Toy story)嘛是美國甭格公司-----皮克斯甭格工作室(Pixar animation studio)佇1995年出的第一齣電影，因為這公司的頭家兼這齣片的導演-----約翰拉撒特(John Lasseter)，伊足愛收集𨑨迌物，所以決定予無生命的物件佇電影內面通親像人類仝款咧活動。這系列的電影有三集，第二集(Toy story 2)是佇1999年出的第三齣；第三集(Toy story 3)是佇2010年出的第十一齣。
第一集拄開始有一個牧場人的𨑨迌物名叫胡迪(Woody)，伊是伊的主人安弟(Andy)尚愛耍的，不管安弟去到叨位，攏會和伊相做伴。佇電影拄開始的彼段是主人安弟的生日，所以伊的朋友送伊足濟禮物，有人送伊便當篋仔、棋盤等等。結果想𣍐到有人送伊一個足新而且閣足夯的太空人𨑨迌物-----巴斯光年(Buzz Lightyear)，所以遐的囡仔著共囥佇安弟的房間眠床頂然後閣離開。巴斯光年一醒起來著發覺伊佇一粒奇怪的星頂，因為伊毋知影家己是𨑨迌物，叫是家己是太空警察。安弟房間的這陣𨑨迌物特別是蕃薯頭先生(Mr. Potato Head)看著這個新的𨑨迌物，著一直恥笑胡迪不如伊。胡迪嘛發覺著伊的主人安弟開足濟時間咧和巴斯耍，心內著愈來愈怨妒，所以著趁主人無佇房間的時，共巴斯擲出窗仔外。主人安弟亻因全家當欲做伙出去食暗頓的時，才發覺巴斯拍見去啊！所以安弟不得已著干焦會當揀胡迪。佇加油站的時，巴斯其實早著已經佇車頂，所以兩個𨑨迌物著咧相拍，拍到車外拄仔好亻因主人的車駛走，這兩個𨑨迌物著去予主人擲佇加油站。按呢亻因欲按怎轉去呢？好佳哉有一臺專工送披薩的車拄仔好嘛來加油站，因為亻因的主人安弟和伊全家攏佇披薩星(Pizza Planet)的所在，所以這兩個𨑨迌物著坐彼臺車去彼所在。到彼所在因為巴斯猶是感覺家己是太空警察，閣彼所在有足濟物件及太空有關係，巴斯著非常好奇。結果想𣍐到胡迪及巴斯走入去鋏𨑨迌物的機器內面，不但無予亻因主人𤆬轉去，反倒轉是去予安弟亻因厝邊隔壁的一個專工欺負𨑨迌物的歹囡仔阿薛(Sid)𤆬轉去。到彼歹囡仔的厝，胡迪看著伊的𨑨迌物，歸個人強欲昏去，因為阿薛共伊小妹漢娜(Hannah)的𨑨迌物鏨人頭閣換鬼頭，阿薛的𨑨迌物嘛攏是去予伊烏白亂改的。隔轉工胡迪及巴斯兩個𨑨迌物當欲偷偷離開阿薛的房間，但是遐的去予阿薛改造過的𨑨迌物煞來阻止亻因，亻因想講遮的𨑨迌物的心嘛是歹的，毋過猶是順利離開房間。但是煞閣去予阿薛的狗阿德(Scud)看著，所以亻因閣去覕，後來巴斯覕佇客廳，聽著有電視咧呼叫巴斯光年，巴斯著卡緊拍開伊手頂的對講機，當欲開始講話的時，煞聽著電視內底有人共伊鬥回答，後來才知影是電視廣告，對彼時才知影家己是𨑨迌物，但伊想講至少伊會當飛，結果想欲到伊是電視廣告內底所講的：「毋是會飛的𨑨迌物。」所以著對樓頂摔落來，摔到手斷去，伊感覺非常心寒。胡迪揣著伊了後，拄仔好揣著一條足長的索仔，所以亻因著對阿薛房間的窗仔牽索仔去安弟房間的窗仔，但是安弟的這陣𨑨迌物內面的蕃薯頭先生不準胡迪轉來，因為伊無看著巴斯和伊做伙，所以胡迪著提巴斯彼支斷去的手來和亻因拍招呼，結果到尾仔嘛是去予亻因看出出，所以亻因著共牽過來的索仔擲掉，然後著毋插胡迪。後來阿薛的𨑨迌物攏共巴斯圍起來，胡迪走去阻止亻因的時，亻因閣來搶胡迪提佇手頂的彼支巴斯斷去的手，後來胡迪才知影原來亻因是咧修理巴斯的手，所以伊誤會著亻因啊！過無偌久，阿薛轉來，閣紮一個炸藥𨑨迌物，伊著決定欲炸掉巴斯光年，好佳哉伊拄共巴斯縛佇炸藥頂了後，拄仔好落雨，所以決定隔轉工接閣做。彼工暗時安弟心內艱苦甲睏𣍐去，伊媽媽著共講：「明仔載你一定會揣著胡迪及巴斯。」差不多佇透早三四點，胡迪睏醒，著叫巴斯來共鬥相共，因為伊去予關佇籃仔內底，而且籃仔頂閣囥一箱家私篋仔，所以需要巴斯來共捒走。但是巴斯感覺家己無才調共人鬥相共，胡迪共講：「你一定是摔到頭殼攏楞去啊！」但巴斯講：「毋是，我頭殼第一擺遮爾清楚，你講的無毋對，我毋是啥物太空警察，我不過是一個𨑨迌物。」胡迪閣講：「好啊！但是你想看覓，做一個𨑨迌物比做太空警察卡好，咱的主人安弟足愛親像你這款的𨑨迌物，因為你會當拍開翼，閣會當講無仝款的話，嘛會當射雷射光，足濟𨑨迌物攏向望家己會當改造親像你這款，老實講你真緣投。我厲害的所在不過是尻脊骿的索仔搝一下，然後會講：『我的靴底有蛇。』按呢爾爾。安弟有你著好啊！哪會需要我？」後來巴斯著共胡迪救出來。救出來無偌久了後，亂鐘仔霆啊！阿薛著起床共巴斯提去外口準備炸掉伊，胡迪毋知欲按怎，因為房間外口閣有阿薛的狗，所以著叫阿薛遐的𨑨迌物來共鬥相共。所有𨑨迌物解決狗了後，著攏集合佇阿薛附近來向伊表達抗議，胡迪嘛出聲共罵，伊著驚甲走去共伊小妹講：「遐的𨑨迌物攏是活的。」伊的小妹著提家己手頂的𨑨迌物來嚇伊。然後胡迪及巴斯著去逐搬厝的卡車，但是去予阿薛的狗逐，巴斯著犧牲家己去阻止彼隻狗，胡迪⻊百去卡車頂揣安弟的彼臺遙控車，毋過遐的𨑨迌物煞共擲落去。後來千里鏡的𨑨迌物(Lenny)看著原來胡迪提遙控車是欲救巴斯，所以弓仔狗(Slinky dog)著共鬥搝來車頂，可惜的是彼臺遙控車無電，弓仔狗嘛擋𣍐牢。好佳哉巴斯尻脊骿的彼個炸藥是火箭，所以胡迪著利用日頭光來點火，毋過胡迪閣足緊張，因為彼個火箭會爆炸。佳哉巴斯拍開伊的翼，予火箭飛去天頂足懸的所在才爆炸。然後巴斯著飛起來，飛去主人安弟亻因兜的車內，安弟掣一下，伊媽媽著共講：「對無，我著共你講你一定揣會著嘛！」電影中的尚後尾段，著是聖誕節，安弟拍開的第一份禮物，是蕃薯頭太太(Mrs. Potato Head)；第二份臆看是啥咧？答案是”一隻狗”。
紲落來是第二集，拄開始胡迪一直咧揣伊的帽仔，因為安弟欲𤆬伊出去耍，所以伊家己愛穿予整齊。同時，暴龍(Rex)的𨑨迌物無張持揤著電視的肯拖拉，拄仔好內面有一個裝做雞的代言人咧廣告有關一間𨑨迌物店，暴龍毋知愛揤叨一粒才會當共電視禁掉，所以彼隻錢筒仔豬(Hamm)來共鬥相共，然後講：「彼隻雞看起來足顧人怨。」後來胡迪雖然揣著帽仔，但是手煞櫳去，所以安弟著毋𤆬伊出去耍啊！胡迪著去予安弟囥佇一個所在，佇遐胡迪佇一本冊的後壁揣著徛鵝的𨑨迌物吱吱(Wheezy)，因為伊梢聲，所以著去予囥佇彼所在。過無偌久，安弟的媽媽佇外口辦二手貨拍賣的活動，伊著來安弟的房間提一寡無需要的物件，想𣍐到吱吱嘛愛去予賣，所以胡迪著叫安弟的狗來𤆬伊去救吱吱。本來遐的𨑨迌物想講胡迪欲賣伊家己，想欲到伊是咧救人。毋過去予一個賊仔偷提走，巴斯去共逐嘛逐著。胡迪一醒起來，發覺家己佇一個奇怪的所在。突然間有一隻馬的𨑨迌物紅心(Bullseye)來及伊耍，有一個女的牧場人的𨑨迌物節絲(Jessie)及一個工人的𨑨迌物彼得(Stinky Pete)攏來及胡迪相借問，而且遮的𨑨迌物攏知影伊的本名，胡迪著掣一個。所以紅心著開電火，胡迪才知影原來這間房間的不管是壁頂抑是櫃頂的物件攏及伊有關係，尚重要的是電視節目及這四個𨑨迌物攏有關係，因為彼是亻因的節目。看了彼得講著：「咱會使去博物館啊！」胡迪聽了著攑起伊的跤共亻因講：「真歹勢！我猶是有主人的𨑨迌物。」亻因聽了非常失望，因為踮佇彼所在著是愛等胡迪來才會當離開。無偌久，彼個偷提𨑨迌物的人倒轉來房間準備欲翕𨑨迌物的團體相，想𣍐到胡迪的手斷去啊！彼人著趕緊敲電話叫人來修理。鏡頭倒轉來到安弟的房間，這陣𨑨迌物咧討論偷提胡迪的賊仔到底是啥人，巴斯突然感覺頭拄仔逐車時，車內落出一個嫌疑的物件，所以伊著提來調查，才知影原來是電視廣告內面的彼個裝做雞的代言人埃呂(Al)，彼隻錢筒仔豬才知影莫怪一看著足顧人怨。亻因著趕緊拍開電視看廣告內面的𨑨迌物店佇叨位，然後巴斯、弓仔狗、暴龍、蕃薯頭先生閣有錢筒仔豬攏相及去揣胡迪。隔轉工亻因行到埃呂𨑨迌物店(Al’s Toy Barn)的對面，但毋知影欲按怎過，所以亻因著試看覓用三角形的障礙物過大路，當亻因行到位的時，對𨑨迌物來講真順利，但是對人類來講交通天反地亂。鏡頭倒轉去埃呂的房間，修理𨑨迌物的工人來啊！伊欲來修理胡迪的手，伊除了修理伊的手以外，嘛共伊鬥抹粉，修理了後，胡迪看起來及新的𨑨迌物仝款。鏡頭閣倒轉去愛呂𨑨迌物店，巴斯看著有歸排的𨑨迌物攏生甲及伊仝款，伊著行去看覓，毋過其中一個巴斯的𨑨迌物煞醒起來，著共安弟的巴斯𨑨迌物講：「你已經犯著6404.5的法規，所有的太空警察攏愛授權才會當醒來，你頭殼是毋是有問題？抑是講你是反背者？」安弟的巴斯𨑨迌物講：「我無時間及你吵，我欲走啊！」另外彼個巴斯閣講：「我命令你徛予好。」然後兩個𨑨迌物著拍起來，安弟的巴斯𨑨迌物著去予另外彼個巴斯𨑨迌物關佇一個盒仔內。無偌久，蕃薯頭先生、暴籠、錢筒仔豬及弓仔狗亻因拄仔好駛𨑨迌物車經過，著順紲載巴斯，彼個巴斯毋知亻因是啥人，但是按怎會綴亻因行呢？因為暴龍最近咧耍有關巴斯拍伊的對手札克(Zurg)的電動，所以伊著共彼個新的巴斯講：「巴斯，我看過一本有關用偷食步的方式來攻擊札克的冊，我會當說明予你聽。」因為按呢彼個新的巴斯才會綴亻因走。鏡頭閣倒轉去埃呂的房間，胡迪及節絲、紅心閣有彼得總共四個𨑨迌物拄翕相了，節絲突然間看起來毋是勢，所以胡迪著去共關心一下，才知影原來節絲本來有一個主人名叫愛美娌(Emily)，伊及伊識耍做伙，毋過後來愛美娌大漢啊！無閣再耍𨑨迌物，所以著共伊細漢的𨑨迌物包括節絲攏擲掉。胡迪想想著決定和遮的𨑨迌物做伙送去日本的博物館。無偌久，安弟的𨑨迌物除了巴斯以外，攏和新的巴斯來到埃呂房間的彼棟大樓樓跤，新的巴斯看著埃呂坐電梯到二十三樓，所以伊著走去邊仔共通風口的門拍開，講：「暴龍，親像你所講的，倒手爿的影。行，咱來去。」巴斯那行那錄音，突然間震動，巴斯驚一個，講：「慘啊！咱的疑點去予札克掠著啊！卡緊揣所在覕。」暴龍講：「毋是啦！是電梯啦！」亻因行到電梯井，巴斯著馬上牽一條索仔，手頂掛吸石，然後貼軌道向二十三樓⻊百去。錢筒仔豬問：「巴斯，哪會毋規氣坐電梯？」巴斯回答：「札克知影咱會按呢做。」⻊百到一半，𨑨迌物無力啊！所有的𨑨迌物一直向下跤滑落去，新的巴斯著馬上揤伊皮帶頂的一粒揤的，然後叫所有𨑨迌物放手，因為伊欲使用反重力的裝備，所有𨑨迌物強欲驚死，毋過亻因嘛是順利到大樓的第二十三層。是按怎新的巴斯會感覺伊順利使用反重力的裝備呢？因為安弟的巴斯𨑨迌物拄仔好坐電梯起來。亻因順通風口的路行到埃呂的房間，通風口的門是關的，暴龍𨑨迌物問講：「巴斯，咱欲按怎才會使拍開門？」新的巴斯著講：「用你的頭殼。」這是啥物意思呢？著是用暴龍𨑨迌物的頭共門挵予開。亻因入來了後馬上共胡迪𤆬離開彼所在，到通風口的門口，閣來一個巴斯，所以兩個巴斯攏咧吵講：「我是巴斯光年，這個部隊是我來負責。」其中一個巴斯閣講：「毋通去予假的巴斯騙，札克訓練伊來學我的動作。」後來其中一個巴斯攑起伊的跤，這陣𨑨迌物看著伊的跤底寫「安弟」，才知影後來出現的才是安弟的巴斯。本來胡迪無想欲和亻因轉去，所以安弟的𨑨迌物攏行原路轉去。但後來胡迪想著一種辦法，著是共節絲、紅心及彼得攏做伙轉去安弟的厝，毋過彼得無愛，伊著共通風口的門鎖予死。無偌久，埃呂轉來啊！伊轉來趕緊款行李，因為伊的飛凌機賰無偌久的時間著欲起飛啊！安弟的𨑨迌物看著埃呂離開伊的房間，著馬上走去電梯彼爿，真歹命，札克的𨑨迌物拄仔好坐電梯起來，所以新的巴斯去解決伊，賰的著去解決胡迪的彼爿。無偌久，暴龍𨑨迌物無張持用伊的尾溜共札克捽對電梯井底。然後弓仔狗拄共埃呂的行李拍開欲救胡迪出來的時，電梯到一樓啊！所以亻因著去駛披薩星公司的車逐埃呂的車，佇路中，車內三個三眼怪(Squeeze Toy Aliens)的𨑨迌物煞飛出去，蕃薯頭先生著去共亻因救，救轉來了後，亻因著講：「因為你救阮，阮非常感謝你。」到機場，亻因著入去行李運送的機房，亻因看著亻因欲揣的行李有兩箱攏生甲完全攏仝款，所以著分兩爿去揣，一陣𨑨迌物揣著的某一箱，毋是埃呂的，內底是囥爍光燈。巴斯掀開另外彼箱的時，彼得著共捒落去，胡迪看著著足受氣，著和彼得相拍，然後所有安弟的𨑨迌物用爍光燈來嚇彼得。胡迪著勸彼得愛學習欲按怎和囡仔耍，然後著共伊送去另外一個行李。紲落來，埃呂行李內底的𨑨迌物攏出來，賰節絲因為𣍐赴著綴行李向前行。胡迪及巴斯兩個𨑨迌物著騎紅心去逐行李運送車，逐到飛凌機頂胡迪拄共節絲救出來當咧對門出去的時，飛凌機的門煞關起來，按呢亻因欲按怎離開呢？好佳哉有緊急出口，所以亻因著對遐出去。毋過飛凌機咧欲起飛啊！所以速度足緊，亻因閣徛𣍐穩，胡迪的帽仔閣落去。好佳哉紅心的速度比飛凌機卡緊，胡迪著趕緊牽索仔然後叫節絲放手，節絲感覺胡迪是咧起痟，毋過最後逐家攏平安無代誌。隔轉工安弟轉來到厝，看著新的𨑨迌物，伊心內著真歡喜及亻因耍做伙。好笑的是安弟亻因兜外口竟然停一臺機場的行李運送車，厝邊隔壁的人著感覺怪怪。不管啦！錢筒仔豬拍開電視看著埃呂紮傷心的心情拍廣告，著笑彼個人，講：「歹人總是會失敗。」蕃薯頭先生及蕃薯頭太太收養彼三個三眼怪；本來梢聲的吱吱嘛去予人修理好啊！伊著來𤆬逐家唱歌，巴斯看著胡迪咧看窗仔外樓跤的安弟，著問講：「你敢是猶咧煩惱？」胡迪回答：「無啦！只要是安弟佇咧我著免煩惱，閣按怎講我閣有巴斯你這款好朋友會當做伴。」
最後咱來講第三集。拄開始，胡迪、巴斯、節絲、紅心、三個三眼怪、蕃薯頭先生及太太、弓仔狗、錢筒仔豬閣有暴龍攏佇箱仔內底，足久攏無去予安弟耍啊！這段時間亻因有足濟朋友攏送予別人啊！親像講牧羊人𨑨迌物、徛鵝𨑨迌物吱吱、妙畫板𨑨迌物(Etch)等等。賰的遮個𨑨迌物著煩惱亻因會去予人擲掉，胡迪著共亻因講：「安弟共咱留到這馬，表示伊足關心咱，無定著伊會共咱囥佇天篷內底，內底有聖誕節的佈置品、舊電視、舊電動。等未來安弟若有囡仔，咱著閣會使及伊的囡仔耍啊！」毋過安弟的媽媽叫安弟愛趕緊整理物件，因為賰無幾工安弟著欲去上大學啊！所以安弟著決定共胡迪留落來綴伊去大學，賰的𨑨迌物攏囥佇糞埽袋仔內然後囥佇天篷頂。毋過真歹命，安弟當咧共伊小妹摩莉(Molly)鬥相共的時，拄仔好共糞埽袋仔囥佇土跤，伊媽媽看著，著共提出去擲佇路邊等糞埽車來收。胡迪著趕緊去救遐個𨑨迌物，毋過亻因早著走出來啊！所有的𨑨迌物決定欲和摩莉的𨑨迌物芭比(Barbie)做伙去送去日頭托兒所(Sunnyside Daycare)，胡迪著共亻因講：「遐毋是一個好所在，恁到時一定會吵講欲轉來。」到托兒所，安弟的𨑨迌物看著托兒所的囡仔攏及托兒所的𨑨迌物耍甲真歡喜，心內著足暢。囡仔離開教室了後，安弟的𨑨迌物對箱仔走出來，所有托兒所的𨑨迌物著足歡喜，講：「新的𨑨迌物來啊！歡迎歡迎！」然後托兒所的熊𨑨迌物羅楚(Lotso)來招待安弟的𨑨迌物，伊講：「正好，咱攏是無人欲愛的𨑨迌物，毋過𣍐要緊，托兒所這所在有足濟囡仔會及咱耍，亻因大漢了後，下一代著閣會入來，按呢恁著毋免煩惱無人及恁耍啊！所以胡迪啊！安弟共你及你的朋友擲掉彼是伊家己欲虧損的。」羅楚講了，著叫阿坤(Ken)來招待新的𨑨迌物，阿坤看著芭比，兩人著一見鍾情，因為這兩個𨑨迌物是仝一系的。芭比看著阿坤的厝大，物件閣足濟，阿坤著講：「是啊！遮濟物件但無伴通分享。」路中拄著一個大嬰仔𨑨迌物(Big Baby)，羅楚著講：「我和這個大嬰仔去予仝一個主人擲出來的。」羅楚共安弟的𨑨迌物安排佇刺毛蟲教室，這教室的𨑨迌物嘛攏出來及新的𨑨迌物相借問，羅楚介紹了後，和芭比、阿坤閣有大嬰仔做伙倒轉去原來的所在。胡迪不斷及安弟的遮的𨑨迌物解釋安弟是欲共亻因囥佇天篷頂，但是遮的𨑨迌物攏毋信，所以胡迪規氣著毋插亻因，家己馬上離開教室，離開托兒所，毋過正無彩，拄離開了後去予一個查某囡仔幫妮(Bonnie)看著，所以胡迪著綴幫妮轉去。無偌久，刺毛蟲教室外口有足濟囡仔咧排隊準備入來，安弟的𨑨迌物著紮暢的心情趕緊徛好，毋過巴斯突然間感覺怪怪，因為頭拄仔這間教室咧及亻因相借問的𨑨迌物攏走去覕起來。幾秒鐘了後，一陣囡仔傱入來教室搶𨑨迌物、咬𨑨迌物、共𨑨迌物烏白亂擲閣有烏白亂畫等等。鏡頭來到幫妮的房間，胡迪識新的𨑨迌物，三角龍犀莉(Trixie)、白色的馬巴達(Buttercup)、針鼠釘仔褲先生(Mr. Pricklepants)、尪姨桃莉(Dolly)。幫妮及亻因做伙耍了後，遮的𨑨迌物攏講：「胡迪，你看起來足有經驗呢！」鏡頭倒轉去托兒所，安弟的𨑨迌物感覺刺毛蟲教室無適合亻因，想欲換去蝶仔教室，因為另外彼間教室的囡仔卡𠢕及𨑨迌物耍。毋過門去予人鎖起來啊！試看別扇嘛攏仝款，窗仔門敢會使？嘛無法度，因為彼種鎖是全世界尚好的番斯特斯尼可勞380型(Fenster-schneckler 380)的鎖。亻因無路通走啊！巴斯著問：「敢有人注意著門頂的氣窗仔？」好佳哉是開的，所以巴斯著跳去頂面然後牽索仔落來接亻因。彼同時，巴斯聽著羅楚的彼陣𨑨迌物咧講亻因的歹話，著將索仔縛佇一個所在然後去查看，毋個去予亻因掠著，所以著共巴斯掠去一個所在。彼同時，羅楚來啊！巴斯著共講：「阮無適合刺毛蟲教室，阮敢會使拜託你共阮徙去別位？」羅楚講：「我了解彼種感覺，但是刺毛蟲教室需要卡新卡勇的𨑨迌物。」巴斯閣講：「你講是有道理。毋過真歹勢我無法度接受，因為我的朋友無適合遐。」羅楚著叫遐的𨑨迌物共巴斯掠予牢，然後拍開伊尻脊骿的蓋，將伊身軀頂的一粒開關對「耍」的模式調做「示範」模式。鏡頭倒轉去安弟的𨑨迌物遐，好佳哉蕃薯頭太太有一蕊目睭佇安弟的房間，所以著利用彼蕊目睭看覓，才知影安弟真正是欲共亻因囥佇天篷頂。彼同時，羅楚及伊遐的𨑨迌物入來，節絲著共講：「喔！真歹勢阮必須愛走啊！」羅楚講：「才拄來無外久爾爾，遮的囡仔攏足疼恁。」蕃薯頭先生講：「啥物疼惜？阮去予亻因咬、烏白擲來擲去、搶來搶去、烏白亂畫。阮欲離開啊！」羅楚閣講：「恁免數想離開。」節絲閣講：「敢是？看誰有才調阻止阮？」結果巴斯來啊！暴龍足歡喜，毋過巴斯煞攻擊安弟的𨑨迌物，然後講：「羅楚長官，所有的歹人攏掠起來啊！」節絲共巴斯解釋講：「咱是朋友啦！」巴斯閣講：「恬恬，札克的手下，太空總部已經共恁收押啊！」然後安弟的𨑨迌物攏去予亻因關佇教室櫃仔頂的籃仔內底。羅楚共蕃薯頭先生安排囥佇外口遊樂場的箱仔內。芭比拄仔好行過來看，毋知發生啥物代誌，問阿坤：「阿坤，到底發生啥物代誌？恁到底是欲對我的朋友創啥？我無愛及你做伙啊！」芭比著甘願和遮的𨑨迌物做伙去予人關起來。然後羅楚叫巴斯共亻因報告：「所有監囚毋通烏白走出來，無著愛睏佇箱仔內；烏白出喙，嘛愛睏佇箱仔內；無經過同意閣共人開喙的人，嘛是愛睏佇箱仔內。」羅楚著提伊所抾著的胡迪交落的彼頂帽仔擲予安弟的𨑨迌物，講：「烏白離開遮，後果無通設想！」安弟的𨑨迌物足艱苦，想講胡迪去予羅楚處理掉啊！鏡頭倒轉去幫妮的房間，胡迪趁幫妮咧睏的時陣，偷偷仔起來調查日頭托兒所的地址，毋過幫妮的𨑨迌物攏起來，看著胡迪，著問伊講：「請問你咧創啥？今仔日耍甲無歡喜喔！」胡迪講：「當然歡喜，足久攏無按呢啊！毋過我猶是有主人的𨑨迌物，看我鞋底寫『安弟』。請問感會使共恁借電腦一下？」調查了後，胡迪真歡喜幫妮的厝離托兒所𣍐遠。毋過幫妮的𨑨迌物問：「你對日頭托兒所來的？遮厲害，你是按怎溜出來？」胡迪著感覺奇怪，哪會問這款問題。亻因講：「彼是無望的所在，有一個身軀頂會發出刺波芳味的邪惡熊老大是統治者。」胡迪問講：「恁敢會是咧講羅楚？」亻因閣講：「外表看起來是正古錐，毋過伊心內有鬼。」胡迪閣問：「恁哪會知？」亻因著請幫妮的丑仔𨑨迌物赤可(Chuckles)說明予伊聽，講：「羅楚、大嬰仔及我，阮三個識是好兄弟，阮有仝一個主人，名叫黛絲(Daisy)。伊足愛阮三個，但是羅楚尚特別，阮三個不管伊到叨位，攏會和阮耍做伙。有一工，黛絲𤆬阮出去耍，佇歇睏站嘛和阮耍，食中晝了後，黛絲睏去啊！阮一直佇歇睏站等伊來揣，毋過一直無轉來。羅楚毋放棄伊，決定行路轉去伊的厝，毋過，𣍐赴啊！黛絲已經閣去買另外一個及羅楚仝款的𨑨迌物取代伊。對彼霎，羅楚的心著變無仝款啊！伊講：『伊取代咱啊！行，咱來去。』我共伊講：『伊取代你爾爾。』伊閣講：『伊取代咱逐家，敢毋是？』阮三個後來揣著日頭托兒所，伊著佔彼所在。羅楚𣍐閣再是我的好朋友，伊嘛毋是任何人的朋友。」胡迪聽了，問：「請問你按怎溜出來？」赤可回答：「我害去啊！幫妮揣著我著共我紮轉來修理，其他的𨑨迌物著無遮爾好命。羅楚的做法實在是毋對，新的𨑨迌物，一點仔機會攏無。」但是我的朋友佇遐，釘仔褲先生及巴達講：「毋通轉去，按呢等於自殺。」犀莉及桃莉接喙講：「你主人安弟欲安怎？伊敢毋是欲𤆬你去大學？」隔轉工早起，胡迪綴幫妮的扣甭來到托兒所，伊著去刺毛蟲教室看，看著遮的囡仔按呢耍𨑨迌物，看甲強欲昏去。好佳哉有一個電話𨑨迌物電話先生(Chatter Telephone)欲揣胡迪來講講，電話先生共胡迪講：「你無應該轉來，自從你離開這所在以後，戒備愈來愈嚴啊！巡邏比進前卡濟啊！請保持莫聳鬚，按呢才會當活落去。」胡迪共講：「多謝你的建議。毋過有人當咧揣阮，阮必須愛離開，你若會當共阮鬥相共，我會真感謝你。拜託拜託！」電話先生閣講：「好，請注意聽！暗時，這間教室的門攏會鎖起來，鎖匙掛佇隔壁的辦公室公佈板頂；逐暗大廳、走廊閣有遊樂場攏有羅楚所安排的卡車𨑨迌物會出來巡邏；牆仔，懸八公尺，無空通軁，必須愛掀過去。」胡迪聽了，講：「按呢爾爾，聽起來正簡單。」電話先生閣講：「毋對，尚重要的是彼隻猴山仔𨑨迌物，不管你去到叨位，伊攏會利用監視器看著這托兒所任何所在。若欲離開遮，尚代先愛解決彼隻猴山仔。」講了拄仔好囡仔攏出去啊！胡迪著叫所有安弟的𨑨迌物集合來討論欲按怎離開托兒所。暗時，阿坤點名點著蕃薯頭先生的時，人無佇籃仔內，伊走去叨呢？伊刁工離開然後徛佇窗仔門遐設法欲拍開窗仔門溜出去，毋過去予阿坤、巴斯閣有大嬰仔看著，亻因著走去阻止伊，彼同時，弓仔狗著趁亻因咧注意蕃薯頭先生的時，偷偷仔離開籃仔然後和胡迪做伙去辦公室處理彼隻監視的猴山仔閣有提鎖匙。彼同時，芭比著哀求阿坤放伊出來，阿坤著軟心共放出來。辦公室的彼隻猴山仔處理了，鎖匙提了，弓仔狗著予監視器幌來幌去報安弟遐的𨑨迌物知，然後錢筒仔豬及暴龍兩個𨑨迌物著假做咧相拍，予巴斯共亻因搝出來阻止，趁彼時，節絲及紅心擲箱仔落來共巴斯封起來。解決了後，順紲提番麥餅予蕃薯頭先生來當做伊的身軀，因為伊所有的零件攏對伊的身軀頂剝落來啊！伊著去調查外口敢有安全，然後閣通知刺毛蟲教室內安弟的𨑨迌物。話講倒轉來，芭比到底佇叨呢？伊和阿坤去阿坤的厝囥衫的所在。趁阿坤咧試衫時，共縛起來，問：「羅楚到底共巴斯變做啥物款？」阿坤閣講：「妳免數想迫我講出來。」芭比著共阿坤掛佇衫仔櫥頂的衫仔褲一領一領裂破，阿坤著趕緊共講：「好啦好啦！我講啦！有一本說明書，羅楚共巴斯調做示範模式啊！」芭比著去提彼本說明書予胡迪，然後亻因做伙轉去刺毛蟲教室共巴斯調倒轉來，無伊會一直叫是家己是太空警察。調了後，巴斯著家己咧踅踅唸，講：「Bitacora Espacial... Me he despertado del hiper-sueño en un planeta extraño. Estoy rodeado por criaturas extrañas, y desconozco sus intenciones.(太空總部你好，我這馬佇一粒奇怪的星頂，邊仔有足濟奇怪的外星生物。)」巴斯對胡迪講：「 ¿Quién anda ahí? ¿Amigo? ¿O enemigo?(誰佇遐？朋友？歹人？)」胡迪回答：「咱攏是Amigo(朋友)啦！」巴斯閣講：「Me debo de haber estrellado y se me ha borrado la memoria. ¿Han visto mi nave espacial?(我大概是頭拄仔摔甲頭楞去啊！請問有人揣著我的太空船無？)」錢筒仔豬著共大家講：「我毋知是按怎？彼部份是西班牙語(Español)模式。」巴斯的戲文著及第一集拄來到安弟房間彼段仝款只是改做西班牙語。亻因走的路中，巴斯閣講：「Mi nave la encontraste? ¡Excelente!(恁知影我的船佇叨位？媠喔！)」到佇遊樂場的設備集合的時，巴斯看著節絲，共講：「¡Mi florecilla del desierto! Yo nunca habia visto la verdadera belleza hasta esta noche.(沙漠的玫瑰！妳是我看過尚媠的。)」節絲問：「恁敢真正共巴斯調倒轉來啊？」胡迪講：「會使按呢講啦！」真可惜，亻因行到糞埽桶彼所在，羅楚來啊！因為亻因攻破電話先生啊！羅楚共亻因講：「恁是咧創啥？欲轉去恁主人身軀邊？伊無愛插恁啊！若是按呢，著愛去予人擲佇糞埽場，是按怎毋來及阮組一個家庭？」節絲接講：「彼根本毋是家庭，是櫳仔，我甘願爛佇糞埽場，嘛無想欲及恁做伙。」阿坤來啊！講：「芭比！小等一下。羅楚，莫按呢好無。」羅楚對阿坤講：「親像芭比這款𨑨迌物有幾若種。」阿坤講：「佇我心內伊毋是。」然後羅楚著共阿坤擲去芭比遐。胡迪問羅楚講：「黛絲呢？伊干焦取代你爾爾，但是你感覺家己無得著別人著攏𣍐當，而且你直直咧騙大嬰仔。」胡迪提出黛絲的名牌共羅楚講：「你的主人疼你，親像逐個囡仔疼家己的𨑨迌物。」因為彼名牌是赤可提予胡迪的。羅楚閣講：「伊從來攏無疼過我。大嬰仔，你閣欲倒轉去你主人遐？伊從來攏無疼過你。莫踮遐親像囡仔款。」大嬰仔聽了著氣甲將羅楚擲落去糞埽桶內。毋過安弟的𨑨迌物中咧離開的時，其中一個三眼怪㧎著糞埽桶的蓋，胡迪去救的同時，去予羅楚搝入去桶仔內，糞埽車閣拄仔好來收糞埽，安弟的𨑨迌物為著救胡迪著綴糞埽車走。佇車頂，因為有另外一攤的糞埽欲倒入來，其中一個糞埽是電視，所以亻因著趕緊閃開。但巴斯無看著節絲，著大聲喝：「Señorita! Señorita, donde estas?(小姐，小姐，妳佇叨？)」伊拄救著節絲了後，結果去予電視硩著，醒起來，講：「彼敢是我的味？」大家著足歡喜伊轉來啊！巴斯著毋知到底發生啥物代誌，胡迪著共講：「你走離開地球啊！太空警察。」無偌久，糞埽車到佇糞埽場，所有的𨑨迌物攏綴運送帶去。彼時，弓仔狗因為是金屬類，所以著吸去頂懸的運送帶，伊著叫逐家注意頭前有切糞埽器。所以逐家著趕緊揣金屬類的糞埽掠予家己通吸去頂懸，亻因嘛順紲救羅楚。過切糞埽彼關了後，頭前是燒糞埽的所在，所以亻因著拜託羅楚去共機器禁掉，毋過當伊到開關遐，閣受氣，講：「恁的主人走去叨位去啊？」然後著放亻因去予燒。因為無路通走啊！所以安弟的𨑨迌物著做伙手牽手準備去予火燒。好佳哉三眼怪用爪仔共救起來，蕃薯頭先生及太太著共亻因三個講：「因為恁救阮，阮非常感謝恁。」羅楚後來走去叨呢？有一個糞埽場的工人揣著伊，著共伊縛佇糞埽車的頭前做飾品。安弟的𨑨迌物欲按怎轉去安弟亻因兜呢？亻因看著一個糞埽車的工人足面熟，所以著坐彼臺糞埽車轉去。轉來了後，胡迪著入去安弟欲提去大學的箱仔內，賰的入去準備欲囥佇天篷頂的箱仔。毋過胡迪趁安弟猶未注意的時，偷偷寫一張紙條貼佇箱仔頂。安弟著共亻因載去幫妮亻因兜送遮的𨑨迌物，想𣍐到胡迪嘛佇箱仔內，安弟著對胡迪講：「胡迪啊！佇我心內你是我尚好的好兄弟，親像一個牧場人仝款勇敢閣巧，所以才會遮爾特別。幫妮，請問妳敢會當好好仔照顧伊？」幫妮著足歡喜接受所有的𨑨迌物。安弟著陪幫妮及遮的𨑨迌物耍做伙，耍了，安弟著駛車離開，胡迪著看安弟的車離開，對伊講：「再會。好兄弟！」
留言列表
