arnoldlin0328的部落格

  這齣甭格電影蟲的危機(A bug's life)是皮克斯公司(Pixar animation studio)佇1998年出品的第二齣電影，仝款是𨑨迌物大集合(Toy story)的導演兼頭家約翰拉撒特(John Lasseter)所導的片。伊感覺第一齣是用無性命的𨑨迌物來寫故事，這齣著是欲及前一齣無仝款，著是用有性命的蟲來寫故事。

  拄開始，一陣狗蟻辛辛苦苦咧搬物件，到底是發生啥物代誌呢？因為草蜢仔隨時會來食狗蟻所替亻因準備的供品。彼時，狗蟻雅婷公主(Princess Atta)心內足煩惱，因為風愈來愈弱，草蜢仔一定會來。所以伊媽媽皇后(Queen)著共講：「免煩惱啦！逐年敢毋是攏仝款？亻因來，亻因食，亻因走。遮簡單啊！」講了突然間天頂落樹枝硩著雅婷公主，原來是狗蟻非力(Flik)咧挽樹枝頂的物件然後擲掉，想𣍐到去擲著公主。伊著趕緊來共回失禮順紲介紹伊新的發明及發現，公主聽𣍐落去著叫伊走。路中，公主的小妹小點仔(Dot)逐過來對非力講：「先生，歹勢，你𣍐記得提你的千里鏡。」非力回答：「多謝妳。彼著送予妳，我會使另外閣做一個。」小點仔講：「你的發明正趣味呢！」非力講：「敢按呢？正好，總算有人接受。」小點仔問：「我媽媽講我的翼愛生好才會當飛，到底愛等到啥物時陣啊？」非力著提一粒石頭予伊，講：「共這當做是種子。妳這馬猶細漢，親像一粒種子，等有一工大漢，親像一粒種子變做一欉樹仔啊！」小點仔聽攏無，毋過伊足愛非力。突然間霆水螺，所有的狗蟻著趕緊共供品囥佇大葉仔頂然後覕佇地下室。逐家攏落去覕啊！賰非力一個猶未將供品囥好，所以著趕緊將機器囥佇遐葉仔頂。毋過正費氣，伊的機器碰著一粒石頭予葉仔無穩，供品攏落落去，伊著趕緊揣雅婷公主。到地下室無偌久，一陣草蜢仔落來，其中一隻是草蜢仔國的頭人，名叫霸王(Hopper)，伊對所有的狗蟻講：「供品佇叨位？我的物件佇叨位？」雅婷公主回答：「敢無佇葉仔頂？」霸王對公主講：「妳是講我戇？咱來想看覓，若真正佇葉仔頂，阮草蜢仔敢有可能落來揣恁？我哪會對公主大聲喝，妳抑毋是皇后。」狗蟻皇后著共講：「伊賰無幾工著欲及我交接啊！」霸王閣講：「所以是公主妳的毋對。所有的原則遮一切攏是妳的毋對。各位，我是有好心欲同情恁的草蜢仔，所以閣欲予恁一擺機會。」皇后閣講：「但因為雨節咧欲到啊！阮狗蟻愛為家己收割物件。」霸王離開進前，講：「恁遮的狗蟻看起來攏毋知影家己是誰，所以供品的份愛雙重，阮會等最後一片葉仔落落來了後再轉來，祝福恁有快樂的熱天。」草蜢仔離開了後，非力著去予掠去講講，伊想想著知影欲按怎為狗蟻國鬥相共，著是出去外口請閣卡大閣勇的蟲來共亻因鬥相共，雅婷公主及其他狗蟻討論了後，著派伊去做。鏡頭來到蟲的城市，有一個馬戲團名叫虼蚤團(P.T Flea Circus)，團長是一隻虼蚤(P. T. Flea)，成員有獨角仙沈(Dim)、烏寡婦蜘蛛羅絲(Rosie)、蝶仔集絲(Gypsy)、草猴曼尼(Manny)、竹仔蟲阿竿(Slim)、團仔蟲阿德及阿勒(Tuck & Roll)、紅娘法蘭斯(Francis)、刺毛蟲哈其林(Heimlich)，遮的是前臺；後臺有兩隻火金蛄做照明師及一隻蜘蛛做鼓手。虼蚤團成員的表演䆀甲予遐的胡蠅攏飛走，所以團長著趕緊出來表演「死亡的火」，毋過無張持燒著家己，胡蠅感覺足精彩，但是團長對成員喝：「恁攏去予追放啊！」無偌久，非力來到蟲的城市踅街，揣著頭拄仔去予追放的彼陣蟲，伊聽著亻因講：「阮是蟲的戰士。」非力聽著著緊去看覓，突然間亻因咧表演的所在杯仔突然振動，挵壁了後，非力看亻因厲害，著拜託亻因來狗蟻國鬥相共，亻因想講是星探，所以著接受啊！轉來到狗蟻國，所有狗蟻攏覕起來，曼尼著講：「看起來咱的歹名聲傳到遮來啊！」非力叫所有狗蟻出來，逐家看著虼蚤團的蟲，著足歡喜。無偌久，狗蟻小朋友著來表演一段予新來的蟲看。亻因看甲強欲驚死，因為想𣍐到亻因愛犧牲遮大，所以著去共非力講亻因是馬戲團，非力著共一陣狗蟻講：「歹勢，阮愛來開祕密會。請逐家小等一下。」非力𤆬彼陣外來蟲來到祕密所在，著問亻因講：「恁哪有可能是馬戲團的成員？」亻因回答：「你好膽莫講這種話，假做星探踅來踅去招人。阮欲來去啊！」非力著去逐亻因，對亻因講：「恁𣍐使走啦！我已經走無路啊！」後來亻因拄仔好拄著一隻鳥仔，所以亻因趕緊揣所在覕。因為小點仔拄仔好摔落來，所以法蘭斯著去救伊，救伊的時，家己煞著傷，所以分兩爿，一爿去救法蘭斯及小點仔；一爿去惹鳥仔。最後亻因覕佇有鑿鑿樹枝的樹仔頂，狗蟻國看著亻因按呢的表現，攏用噗仔聲來共鼓勵。紲落來，逐家著去地下室歇睏，非力及雅婷公主兩人開講的時，雅婷公主講著：「霸王嘛會驚鳥仔。」非力聽著這點著馬上去揣彼陣虼蚤團的蟲參詳，非力想著愛請逐家來做一隻假鳥仔來嚇霸王。鏡頭換到草蜢仔國的所在，霸王的小弟著共伊阿兄講：「咱遮已經有夠食啊！根本無需要轉去狗蟻國及亻因討，反正你嘛討厭粟仔。」霸王著出來共逐家講：「各位，請逐家繼續耍，因為咱決定欲留落來。」但是後來伊改變心意，閣講：「遐竟然有一隻狗蟻敢反抗我，若一隻狗蟻敢，幾若隻會出來反抗，我需要毋是供品，我是欲予亻因一份功課，所以咱愛轉去。請問敢有人欲留落來？若無，行，咱來去。」鏡頭閣倒轉來狗蟻國，一陣狗蟻及虼蚤團的蟲耍甲真歡喜，無偌久，虼蚤團長來啊！因為伊的劇場東山閣起啊！所以欲來共團員接轉去，虼蚤共伊的團介紹予逐家，狗蟻國知影非力進前所講亻因是戰士是咧講白賊，所以著和遐的虼蚤團的蟲去予狗蟻國趕走。隔轉工，草蜢仔閣來到狗蟻國，霸王大聲喝：「恁遮的毋成囝，我閣予恁一概機會，結果才按呢爾爾。所有的狗蟻攏𣍐使歇睏，直直到恁共這所在所有的物件攏揣出來。」小點仔𤆬一陣細漢狗蟻做伙覕佇樹枝內，佇內底伊偷偷仔聽著外口兩隻草蜢仔咧開講，聽著亻因講：「等遮的狗蟻共物件揣出來了後，咱著刣死皇后。」小點仔聽著這句，趕緊一個人去揣非力。非力看著小點仔來，看著伊已經會曉飛，著驚一下。小點仔共逐家報告狗蟻國的代誌，本來非力感覺伊的發明及發現的假鳥仔無效，小點仔著去提一粒石頭囥佇非力邊仔，講：「共這當做是種子。」非力馬上改變心意，決定轉去狗蟻國。非力到遐著請虼蚤團的蟲負責引起草蜢仔的注意，非力著去𤆬一陣細漢狗蟻來控制假鳥仔。假鳥仔落來了，下跤所有的蟲攏假做著傷來嚇彼陣草蜢仔。但到尾仔，龜跤趖出來啊！霸王知影這是非力的發明及發現，所以著共伊拍落去。霸王對所有的狗蟻講：「這著是予恁狗蟻的一份功課。」非力⻊百起來共講：「狗蟻，根本毋是專工服侍草蜢仔的奴隸，我看這陣狗蟻足有能力，狗蟻無應該驚草蜢仔，是草蜢仔需要狗蟻。」逐家聽了，著向前去嚇草蜢仔，一睏仔著將所有的草蜢仔攏嚇走啊！賰霸王一個，狗蟻著將伊囥佇砲仔空內，可惜是亻因當欲共霸王射出去的時，煞落大雨啊！逐家著趕緊覕佇地下室，霸王趁亂將非力掠去，好佳哉雅婷公主技術好，共非力救起來。本來應該是愛飛轉去狗蟻國，毋過是按怎飛去別位呢？因為非力欲利用真正的鳥仔共霸王食去，好佳哉非力的方法是對的，歹心的霸王去予鳥仔及鳥仔的囡仔食去啊！過無幾工，春天到啊！狗蟻國的大欉樹仔櫻花盛開，虼蚤團的蟲嘛佇遮蹛一段時間了後必須愛離開啊！因為亻因猶有工作愛做，好笑的是，霸王伊小弟嘛加入亻因的馬戲團。虼蚤團長問非力，講：「你敢真正無欲及阮做伙去巡迴？」非力回答：「歹勢，阮兜佇遮。」虼蚤團長閣講：「這是你家己講的喔！」虼蚤團離開的路中，發覺煞𣍐記得哈其林，想𣍐到，哈其林對刺毛蟲變做一隻媠媠的蝶仔啊！離開的時陣，狗蟻國著用番麥放煙火來歡送虼蚤團。