2014年06月28號，我和媽媽及姊姊去臺南𨑨迌。第一工正特別，著是去臺南的教會參加婚禮，因為我媽媽愛去共人鬥彈琴。參加婚禮了後，阮著坐火車去臺南市臺南區稅兩臺漚途眉，我騎一臺；媽媽載姊姊，騎去蹛的所在------夏木民宿。彼間民宿是古早厝，浮呂間是及別人公家用的。阮佇房間歇睏了後，下晡18:00阮騎漚途眉去海安路遐踅街。阮踅著一間意麵店，著入去食，彼間餐廳的意麵是臺南才有的喔！
食了閣繼續踅，踅到一間咖啡館，著入去啉。彼間店的裝潢𣍐䆀，有綠色大漢人(Hulk)及超人先生(Mr. Incredible)的雕像。
第二工早起七點，阮去千箍牛肉這間店排隊，這間店是民宿的頭家特別推薦的，毋過因為阮傷晏去排，所以排無著，阮著換去食臺南的肉燥飯。
紲落來，阮去安平古堡。這所在普通時攏干焦佇課本頂才看會著，到今著有機會通用家己的目睭看及用家己的翕相機翕相。
紲落來，阮去臺江內海遐坐兩臺船。尚代先，阮去坐臺江觀光船。一路攏看著足濟白翎鷥閣有流蟹，尚重要的是我閣有看著佇KANO這齣電影中的景------嘉南大圳。像遮的物件課本根本攏無咧教，課本攏咧洗咱臺灣人的腦。坐觀光船了後，著去坐四草磅空的船。坐船的時，咱遊客攏愛戴甲箬笠，因為樹仔攏足低，驚頭會去挵著。
沿路坐到綠色磅空的時，足涼的，好笑的是阮對磅空出來的時，導遊著講：「好啊！冷氣欲禁掉啊！」然後看著對面來另外一臺船，閣共亻因講：「緊入去吹冷氣喔！」紲落來阮去臺灣文學館，內底有足濟臺語、客語及原住民文學家的介紹，其中我閣看著有關進前識佇2013年12月28號佇臺北南港展覽館的客家博覽會及伊做伙翕過相的彼位寫客話歌的謝宇威老師的介紹，我著一直及彼個介紹牌仔翕相。
臺灣文學館閣有足好耍的物件，叫做用動作來寫歌，這若像是利用Xbox Kinect這臺機器來予人客耍，這臺機器著是予人徛佇範圍內八秒鐘內做一個動作，然後電視著會感應你的動作大概佇叨八個音。
踅了，著去食塢輪，彼間塢輪店耍錢是看人提外濟籤來耍的。
食了著倒轉去民宿小歇一下。暗時阮出去食度小月，這間是臺南總店，內底的物件攏𣍐䆀，我食豬油拌飯，阮公家食白菜滷、蝦捲及虱目魚。
第三工早起六點，阮著趕緊去排千箍牛肉，正好運，這擺排著啊！這間的牛肉湯是臺南尚蓋好食的，來臺南一定愛來食一頓。這間拜二歇睏無咧賣。
食了著去巴克禮公園行行，彼所在的樹仔有夠肥的。
阮踅了著閣倒轉去民宿款行李閣有小歇一個。差不多佇十一點外阮著離開民宿，共民宿的鐵門搝落來然後鎖起來，鎖匙著對鐵門的縫擲入去，民宿的頭家到時會來整理。阮騎漚途眉離開民宿去還漚途眉了後，著及蹛佇臺南的朋友約佇遐。阮及亻因去成功大學附近的西方餐廳食飯及開講。阮開差不多一點半鐘的時間開講，開講了後著去坐高鐵轉去臺北。
留言列表
