2014年06月28日，𠊎摎阿姆摎阿姊去臺南遊尞。第一件事係去臺南个教會參加婚禮，因為𠊎个阿姆愛𢯭手彈琴。參加婚禮後，𠊎兜就坐火車去臺南市臺南區稅兩臺機車，𠊎騎一臺；阿姆載阿姊，𠊎兜騎去歇个所在------夏木民宿歇睏。該民宿係老屋仔，浴堂愛摎別人共下輪流用。歇睏後，暗晡18:00去海安路遊街。𠊎兜看著意麵店，就入去食，該店个意麵獨獨在臺南。
食忒後，繼續遊街。看著一間咖啡館，就入去啉，該所在个裝潢罔罔仔，裡肚有綠大人(Hulk)摎超能先生(Mr. Incredible)个塑像。
第二日朝晨七點，𠊎兜去千元牛肉排列，該係民宿个頭家推薦个店，毋過𠊎兜排無，就去食肉燥飯。
接等𠊎兜去安平古堡，該所在平常都在課本裡背看著，如今，𠊎有機會用自家个目珠看摎用自家个卡嚒拉翕相。
接等𠊎兜去臺江內海坐兩臺船。首先，𠊎兜坐臺江觀光船，𠊎有看著當多个白鶴仔摎招潮蟹，最重要係𠊎看著電影KANO中个背景------嘉南大圳。這兜東西課本都毋會講，課本都在洗臺灣人个腦。坐觀光船後，就去坐四草窿个船。坐船个時節，亻恩兜遊客愛戴等笠嫲，因為樹仔當低，會磕頭。
坐到綠色窿个時，當涼，好笑係導遊在𠊎兜離開窿个時，就講：「冷氣愛關忒了！」佢看著有別臺船來，就摎佢等講：「遽遽來吹冷氣。」接等𠊎兜去臺灣文學館，裡肚有當多个臺灣話、客家話摎原住民話文學家个紹介，𠊎有看著有關先前識在2013年12月28日在臺北南港展覽館个客家博覽會摎佢共下翕相个謝宇威老師，𠊎就摎佢个紹介牌仔翕相。
臺灣文學館有一種當好搞个東西喊做用動作寫歌，該東西可能用Xbox Kinect來分人客搞个。
接等𠊎兜去食噢田，該店用計算人客拿幾多籤仔來算錢。
食忒後就倒轉去民宿歇睏。暗晡𠊎兜去食渡小月，該係臺南總店，𠊎食豬油拌飯，𠊎兜共下食白菜滷、蝦捲摎虱目魚。
第三日朝晨六點，𠊎兜去食千元牛肉，這擺有排著，該牛肉湯係臺南當好食个，來臺南一定愛來食。該店火曜歇工。
食忒後𠊎兜去巴克禮公園，該所在个樹仔當肥。
𠊎兜轉去民宿整理行李摎歇睏。接等𠊎兜就騎機車去還。𠊎兜將民宿个鐵門鎖起來然後將民宿个鎖匙從鐵門个縫仔拂入，民宿个頭家會來整理。還忒機車後，𠊎兜就摎歇在臺南个朋友約在該位，𠊎兜去成功大學附近个西洋餐廳食晝摎坐尞。坐尞到差毋多一點半鐘後，𠊎兜就去坐高鐵轉去臺北。
留言列表
