人人攏向望家己攏毋免做啥著會使得著家己欲愛的，敢按呢？皮克斯公司(Pixar animation studio)佇2008年出第九齣片-----瓦利(Wall-E)，仝款是海洋大集合(Finding Nemo)的導演安得呂斯丹頓(Andrew Stanton)來做這齣的導演。瓦利這齣片差不多佇𨑨迌物大集合第一集(Toy story)做了無偌久，著開始咧計畫啊！所以差不多畫十偌年。
電影拄開始，地球因為空氣愈來愈䆀，人人攏徙去大賣家公司(Buy N Large)的公理號太空船(Axiom)生活，地球著交予清糞埽的機器人來處理。毋過，過七百年了後，地球頂的機器人攏故障啊！賰一臺機器人瓦利(Wall-E)猶活咧，伊逐工攏咧摒掃。有一工，伊摒掃的時，揣著一隻虼蠽，著及伊做朋友。到佇瓦利的厝，瓦利著將伊清糞埽的時抾著的物件提出來耍。隔轉工早起，瓦利起床啊！但伊因為無電所以行路歪來歪去，因為伊是靠日頭的光來充電。充電了後，瓦利著閣繼續做伊的工課。伊清糞埽的時抾著尪仔、電火球仔等等遮的予伊好奇的物件攏共收入去伊的篋仔內。後來伊佇某一個所在揣著一個莖及葉仔的物件，伊嘛共收入去篋仔內。轉來到厝囥物件的時，瓦利看著塗跤有一點紅光，伊著去共逐，逐到空地，突然間有足濟紅點光，然後太空梭落來啊！瓦利強欲驚死。原來是探測器夏娃(Eve)去予派來調查地球這馬的款。這種機器人會用電腦掃伊所看著的物件，伊嘛會曉飛，閣會當發射雷射。瓦利看甲足佮意，著想欲揣機會及伊交朋友。瓦利不斷試探夏娃，攏無效。夏娃繼續掃地球的物件，毋過伊所掃過的物件，伊的胸坎仔攏是爍紅燈。瓦利繼續試探夏娃，這擺著成功啊！兩個機器人著成做好朋友。瓦利𤆬夏娃轉去厝，著將伊所抾著的物件分享予夏娃。後來瓦利提有莖及葉仔的植物予夏娃看，夏娃共掃一下，突然間伊的胸坎仔爍青燈，著將植物收入去伊的腹內，然後進入待命模式。瓦利毋知欲按怎共叫予醒，著共囥佇厝尾頂然後陪伊。落雨啊！瓦利著共伊鬥遮予，隔轉工，瓦利嘛𤆬夏娃出去散步。毋過瓦利按怎做，攏無法度共夏娃叫予醒，所以著繼續清糞埽。清到一半，太空梭欲來接夏娃轉去啊！瓦利著趕緊轉去咧彼臺去，叫伊的虼蠽朋友踮佇地球等。然後瓦利著咧太空梭離開地球。路中，瓦利才知影宇宙是非常闊，拄仔好經過日頭，瓦利著順紲共家己充電。到公理號的一個所在，彼所在的機器著將所有的探測器提來檢查。清潔隊機器人負責檢查身軀頂敢有垃圾，若有，隊長阿毛(M-o)會𤆬頭清理；調查隊機器人古夫(Go-4)負責檢查探測器身軀頂有紮啥外來的物件來。瓦利著偷偷佔位，阿毛檢查著伊的時，心內著敢覺傷譀啊！瓦利身軀頂有百分之百的外來污染來源，阿毛著共清，但瓦利𣍐慣勢所以著一直蟯蟯趖。然後古夫來檢查探測器，測著夏娃紮植物轉來，所以著趕緊叫其他的機器人來共送去船長室。瓦利著家己綴亻因行，阿毛看著塗跤有瓦利的跤跡，著綴這跤跡清塗跤。瓦利逐夏娃亻因的路中，看著足濟機器人而且閣有人類。船頂的人攏生甲足大箍，因為亻因幾若年來不管是行路、耍、洗身軀、煮食等等，攏是靠機器人。瓦利佇路中，有一個查埔人對伊講：「服務機器人，請共杯仔提去。」因為瓦利毋知發生啥物代誌，著害彼人對機器椅仔頂跋落來，所以瓦利著共扞起來囥佇機器椅仔頂然後兩個著熟似啊！瓦利介紹伊家己予彼查埔人，彼人回答：「我叫約翰(John)。」然後瓦利看著夏娃亻因坐電車欲離開啊！伊著趕緊去坐彼臺電車。佇電車頂，瓦利欲去陪夏娃，但是中央有一個坐佇機器椅仔頂的查某人擋著伊的路，所以著去共拜託借伊過順紲介紹家己，彼查某人講：「我叫瑪莉(Mary)。你欲過？好，𣍐要緊，請。」到終點站，瓦利著咧夏娃去船長室。到佇遐，熯圖魯奧多(Auto)著去叫船長起床。船長起來，著叫兩臺機器人來共鬥洗喙、掠龍及捋頭毛，然後去見奧多。來到奧多遐，船長共奧多講：「你哪會無叫我起來廣播？這是我佇船頂唯一通做的代誌。」廣播了後，伊看著船長室的一粒揤的咧爍青燈。奧多共講：「船長，一號探測器紮貨樣轉來啊！」船長聽了著揤青色彼粒，然後有電視螢幕降落來，內底的總裁講：「恭喜啦！你的一號探測器夏娃紮一項咧行光合作用的植物。恁遐有一本手冊，照彼本的指示做，共植物囥入去游泳池附近的全向偵測器內，太空船會馬上𤆬恁轉去地球。因為恁佇太空有幾若年的時間，恁有小可仔骨質流失，但𣍐要緊，只要佇船頂的運動埕走走，著無問題啊！期待恁早日轉來。」講了，船長著去提彼本手冊，然後對手冊講：「手冊，請傳信息。」手冊無反應，熯圖魯奧多著共彼本掀開，船長才知影是一搬的冊。船長著照彼本冊的撇步唸一個詞，然後有機器降落來，電腦著對船長講：「對聲音。」船長毋知欲創啥，著講：「啊～～～」電腦著講：「符合。」然後彼臺機器著去共探測器夏娃身軀頭前的蓋拍開，船長講：「植物佇叨？看來是咱𣍐記得一項撇步。」夏娃心內緊張甲咧揣伊抾著的植物。後來船長著拜託奧多共掃看敢真正有，奧多掃了，講：「內底無貨樣。探測器的電腦出問題。」船長著取消轉去地球的計劃，然後拜託人共夏娃𤆬去修理。佇彼霎，船長看著瓦利，瓦利著來及伊握手，船長著講：「敢會使共瓦利洗予清氣？」瓦利及夏娃兩臺機器人著予人載去修理室。修理室內底，有足濟修理𣍐好的機器人攏去予關起來。夏娃予機器人𤆬入去修理，瓦利去予關起來。夏娃佇內底去予修理的時，伊的手去予剝落來，瓦利看著驚甲欲死，所以著趕緊入去共伊的手對修理的機器人搶來，無張持去揤著開銃鍵，著將修理室的總開關拍歹去。修理的機器人攏禁掉啊！關機器人的門攏開啊！所有關佇修理室的機器人攏走出去然後去予機器警察圍起來，亻因著共瓦利擲佇尚頭前。夏娃飛來，共伊的手對瓦利搶轉來，佇彼霎，機器警察翕相，規臺船的電腦螢幕走出瓦利及夏娃的相片然後廣播：「注意，逃犯的機器人。」夏娃足氣瓦利，著決定去共瓦利送轉去地球。送的時陣，古夫拄仔好來啊！瓦利及夏娃覕起來，看著古夫共植物囥佇送去地球的船頂，瓦利著去抾，古夫佇彼霎，著將送轉去地球的小船啟動，瓦利著和彼臺小船離開公理號，夏娃著趕緊飛出去共救。後來，彼臺小船爆炸，夏娃叫是瓦利去予炸掉啊！伊著飛過去看，想𣍐到瓦利猶活咧。瓦利著將植物交予夏娃，夏娃足歡喜然後及瓦利去散步。轉來到公理號船頂，夏娃叫瓦利踮佇一個所在等，然後伊去揣船長。來到船長室，夏娃著將植物交予船長，船長著歡喜講：「咱會使轉去地球啊！請問地球是啥物款？𣍐要緊，我家己看。」船長著將天線貼佇夏娃的頭頂，天線著將夏娃佇地球頂錄影出來的畫面放出來。船長看著，講：「奇怪，這無啥成地球，無藍色的天，嘛無青翠的草埔。」但影片放到瓦利房間彼段，閣講：「我知影這首歌。遮的人咧跳舞。」後來影片放到夏娃佇地球的時進入睏眠模式所錄著的，夏娃看著原來瓦利遮爾仔疼伊，落雨共伊鬥遮雨，寒的時閣共伊疊衫。瓦利佇樓跤等傷久，著去⻊百糞埽道去揣夏娃。船長決定欲行轉去地球的計畫，著請奧多來共鬥相共，但奧多煞講：「無需要按呢，共植物交予我。」船長講：「老實講，這件代誌我會當家己來處理。」但奧多一直阻止伊，所以船長著命令奧多愛共解釋，奧多著去放影片予看，影片內底的總裁講：「所有的人，真歹勢，我有一項歹消息。淨化地球失敗，想𣍐到地球愈來愈濟毒，生物無通活。請逐家盡量留佇船頂卡安全，咱必須愛取消轉去地球的計畫，請毋通試看解決這種問題。」船長看了，著講：「電腦，請問這是啥物時陣傳來到公理號？」電腦回答：「這消息佇2110年傳到遮。」船長對奧多講：「這差不多七百年前的代誌啊！這馬情形已經改變，咱必須愛轉去地球，這馬我手頂提的植物當咧大漢，若有遮的著會使證明伊講的是毋對的。我蹛佇這臺漚船頂，啥物代誌攏無通做，這臺船頂的人攏仝款，荏懶。」奧多講：「恁佇公理號通活。」船長講：「我無想欲干焦活著好，我欲活甲有意義。」奧多著叫古夫共植物提去擲落去糞埽場內。好佳哉瓦利⻊百起來，毋過奧多著共電予昏去然後擲落去糞埽場，嘛順紲共夏娃擲落去，然後共船長鎖佇船長室。佇糞埽場，夏娃醒來，看著瓦利參一堆糞埽準備欲去予擲出去，夏娃著去共救起來，拄仔好阿毛嘛來順紲救亻因，亻因差一點仔去予擲出去太空船。救轉來了後，因為瓦利頭拄仔去予奧多電，所以晶片害去啊！夏娃著去揣看糞埽場內底敢有其他的晶片。彼時，阿毛共瓦利清予清氣順紲自我介紹。夏娃轉來，將伊所揣著的晶片紮來，毋過無一項合瓦利的電腦規格。不管啦！夏娃𤆬瓦利及阿毛飛倒轉去船頂去解決植物的代誌。到船頂，因為瓦利及夏娃猶咧去予通緝，機器警察看著亻因著閣共翕相然後閣廣播：「注意，逃犯的機器人。」熯圖魯奧多著派足濟機器警察來共掠。船長看著新的相片，著馬上接電線廣播：「瓦利及夏娃，我去予鎖佇船長室內，請恁趕緊共植物囥佇全向偵測器內，請趕緊做，奧多會共信號切斷……」然後船長假做手頂提植物放畫面予奧多看，共講：「哈哈哈，戇人，我提著啥物？無毋對，著是植物。若欲提著趕緊來提。」然後船長著覕起來，奧多來揣伊，船長著跳離開椅仔，跳去伊的身軀頂共掠予絚，奧多一直想辦法欲共船長摔掉，拄仔好古夫來啊！但因為摔來摔去著共古夫踢出窗仔外摔歹去。鏡頭倒轉來到瓦利及夏娃遐，彼陣對修理室走出來的機器人共所有的機器警察拍予害去，然後趕緊去游泳池遐。船長趕緊揤彼粒全向偵測器的鍵。所有坐機器椅仔的人攏去游泳池遐集合，瓦利亻因嘛做伙去遐。船長趕緊廣播，講：「各位朋友，咱的熯圖魯有小可仔出問題，請逐家保持冷靜。」逐家攏看著熯圖魯一直咧摔船長。後來，熯圖魯奧多著踅幾若輪，規臺船著歪斜，所有的人及機器人攏向歪斜的方向滑落去，奧多著將全向偵測器禁掉，但瓦利佇遐咧阻止機器禁掉，著去予機器硩落去。船長看𣍐落去啊！著決定徛起來去阻止奧多。因為船頂的人類有幾若年攏無用跤行路，所以船長徛𣍐穩。到尾仔，船長行到奧多遐共掠牢，然後揤伊頂懸紅色彼粒，共講：「奧多，你辭頭路啊！」然後熯圖魯奧多的自動模式著去予禁掉啊！然後夏娃著趕緊去救瓦利，那救那喝：「植物！植物！」逐家著趕緊共植物提予夏娃，夏娃接閣共囥佇全向偵測器內，瓦利著脫離危險，毋過瓦利規個昏去啊！植物囥入去全向偵測器內了後，規臺公理號太空船著用足緊的速度衝去地球。轉來到地球，踮佇遐等足久的虼蠽著足歡喜主人瓦利轉來啊！毋過瓦利規個昏去，所以夏娃著趕緊共𤆬轉去伊蹛的所在共修理，所有的人及機器人攏咧替伊煩惱。修理了後，瓦利醒起來啊！夏娃及虼蠽足歡喜，毋過因為換晶片的關係瓦利失去記性啊！夏娃著決定牽伊的手閣共唚一下然後離開。離開彼霎，夏娃的手挽𣍐出來，瓦利突然間恢復記性啊！夏娃及虼蠽閣有所有的人攏歡喜去做家己的代誌。船長講：「有土閣有水會當種出足濟種物件。哇哈哈！真歡喜通倒轉來地球。」
留言列表
