2014/02/15朝晨07:30，𠊎兜教會學生仔牧區所有个人都集合準備出發，𠊎等兩輛遊覽車，𠊎坐在第一輛。上車出發無幾久愛做麼个呢？𠊎兜人愛共下來為這兩日个門徒營祈禱。所以𠊎兜第一車就請小𠊎幾個月个姊妹Joy來帶等大家祈禱。𠊎係該活動負責錄影个人，所以該時𠊎一片錄影一片祈禱講：「阿爸上帝啊，求你賜分𠊎兜好天，使活動做得進行順利。哈利路亞！……」到活動个所在------陽明山某位，𠊎兜拿等自家个行李下車，順續仔搬活動个設備去禮堂。到禮堂，大家都坐下來，𠊎企在後背錄影。活動開始前愛做麼个呢？愛請該擺活動个班長Tony兄弟來摎大家講活動規範，佢講：「請大家揙到手冊第二頁。大家敢有看到亻恩个時間表？請大家注意，愛在坐尞个時間正做得去食點心。𠊎若吹嗶嗶仔，好好壞壞，請放下你所有个工作轉來禮堂。」講忒後接等係破冰時間，𠊎兜大家去禮堂外背个籃球場尞。這兩日个破冰主持人都係Joy姊妹摎阿耀兄弟。𠊎兜在籃球場尞「膨尾鼠摎樹」。愛仰般尞呢？三人一組，兩儕人牽手做樹，一儕人包在兩儕人裡背，主持人若講：「木匠來了！」牽手个兩儕人愛離開去包別人；主持人若講：「獵人來了！」包在裡背个人愛離開去尋別人包；主持人若講：「森林大火！」所有个人愛離開去重組。𠊎係負責錄影个人，敢有去尞？有，𠊎請阿丹兄弟錄影然後𠊎入去摎大家尞。毋過𠊎尞無幾久因為尋無人就失格了，所以𠊎就繼續錄影。尞忒後就轉去禮堂上課，第一堂課係「兵團選拔」，講師係該擺活動个班長，內容係有關孤兒个靈摎兒女个靈有麼个無共樣。打白講𠊎心中曾經有孤兒个靈，特別係𠊎非常細心細意在別人个眼光。感謝主分𠊎經歷著佢，𠊎正知做麼个愛逐日靈修，因為世間个東西總係千變萬化，獨獨主耶穌基督永遠毋會變。所以若沉迷在世間个東西，總愛有粗粗仔改變，就會分人試著自家活毋落去。上忒課後下課十分鐘，𠊎兜後背有福利社分大家買東西食摎尞，負責人也係𠊎兜教會个人。另外還有一個箱仔摎卡片，分𠊎兜寫分任何愛感謝个人，寫忒就放入箱仔裡背。𠊎寫卡片分Cynthia姊妹、Jason兄弟、Ginger姊妹、阿葳姊妹摎博士兄弟，感謝佢等个𢯭手，𠊎在第一堂課敬拜个時節，本來打算用手將三腳架擎起來分錄影機鏡頭做得翕著棚前，承蒙佢兜幫𠊎搬凳仔來分𠊎做得輕鬆錄影。第二堂課係「兵團訓練」，講師係博士兄弟，內容係有關教會个小組。該堂課𠊎特別學著个係教會个小組毋係團契，𠊎摎大家分享。組織方面，團契較糝糝，小組較嚴密；目的方面，團契聯誼，小組添加；運用方面，團契看活動，小組看互動；功能方面，團契有限制，小組係全面个。下課過後，當晝个時節到了！𠊎兜大家去食東西。食个時節，𠊎夾一尾魚仔个卵，𠊎這桌个人就喊𠊎遽遽食忒。食了過後，下晝頭𠊎兜去尞「揪揪閃閃」，愛仰般尞呢？所有个人圍做一圈，左手比一放在右片人个手下背；右手比五放在左片人个手上頭。主持人在講話个時節，若有講著「愛」，右手就愛揪右片人个手；左手愛閃，做毋得分左片人揪著。𠊎無摎佢等尞，因為𠊎尞過當多擺，就決定來錄影。尞過後就去禮堂上第三堂課，該堂課喊做「兵團實戰演練」，講師本本係博士兄弟，內容係有關批評。打白講𠊎盡會批評人，因為𠊎輒常為著自家个利益。毋過當𠊎若愛去批評人，心中會想著今晡日若係𠊎自家分人恁樣對待，𠊎个感覺會仰般？所以當𠊎想愛批評人个時節，都會祈禱向上帝講，求上帝分𠊎知係別人个過錯也係𠊎自家。接等係「進擊个巨人」，𠊎兜分組去走關。總共有五個關，𠊎這組个第一關係愛旋轉五圈然後關主會分𠊎兜任務；𠊎兜个第二關係含等吮管，用吮管來傳衛生紙。尞个時節，派大星緊在笑害𠊎兜大家也在笑，所以關主軟心就分𠊎這組無條件過關；第三關喊做「白泡泡幼糜糜」，摎電視節目「綜藝大集合」差毋多。𠊎將球吹出去過後，就變做老人；第四關就係愛去揪揞目珠个人，而且做毋得分佢个手巾仔拂到；包尾一關就係愛去搶寶劍摎阻攔關主搶位仔。尞過後，𠊎兜去食晚餐然後去上第四堂課「傳承个暗晡」，講師係阿霖傳道，內容係有關經營教會个方法，𠊎特別愛摎大家分享𠊎所學著个。𠊎等大家做麼个來到地球呢？因為𠊎等大家愛在這個孤單个地球摎上帝建立關係。相信主耶和華係起頭，歇在耶和華个聖殿中係重點。另外還有愛摎大家強調，教會愛「老實」毋係「表面」；教會愛「鼓勵」毋係「批評」；教會愛「接納」毋係「否認」；教會愛「支持」毋係「怪怨」；教會愛「輒輒聯絡」毋係「獨獨聚會」。下課過後，𠊎兜大家都準備去洗身。毋過𠊎房間隔壁阿丹摎阿耀个房間有洗身間，所以𠊎兜教會个人都來摎佢等借。
隔日朝晨，𠊎兜先去靈修然後食朝。食朝過後又係破冰个時間，這界嘸喊做「猜自家个隊員」。請輔導出來尞，隊員對輔導講話，輔導愛猜係麼人个聲，若猜毋著，就愛用目眉毛寫字做處罰。想毋來，所有个輔導都輸忒了！接等係最尾一堂課「摝動天下啦！」，講師係阿葳姊妹，內容係有關為主做工摎傳福音。𠊎愛來摎大家分享𠊎所學著个。感謝上帝分𠊎到這間教會，因為這間教會个異象係「極大影響力个教會，極大影響力个自家」。𠊎希望自家做得成做有影響力个人，所以感謝上帝在2008年帶等𠊎到這間教大家影響力个教會。愛仰般做呢？首先，就係聖靈充滿；二，見證上帝个作為，包含講方言、分人得著醫治、趕鬼、知掩情、死人復活、看著異象、講預言摎分人領受聖靈；三，等候上帝然後無停祈禱，還有互相相愛。上課過後係差派禮，所有个人包含後棚錄影个𠊎都愛去棚前分人祈禱。差派禮過後，係榮耀个時間。這擺活動个班長Tony兄弟頒一條鍬苛列分𠊎，因為佢試著𠊎在後棚錄影當打拚，連寫字也企等寫。感謝佢个稱讚，毋過𠊎這兩日毋坐下來也係因為愛預防自家啄目睡。
這擺活動除忒分𠊎做得服事主以外，又做得學著當多東西。𠊎愛感謝上帝聽𠊎兜第一日出發个祈禱，賜分𠊎兜好天，分活動順利。未來還有當多活動，求上帝利用𠊎兜後生人个影響力來為主見證。請大家將榮耀歸在至高个主，哈利路亞！
留言列表
