2014/02/15早起07:30，阮教會青年學生區所有的人攏集合準備欲出發，阮叫兩臺遊覽車，我坐第一臺。上車出發無偌久愛創啥呢？阮愛來為這幾工的門徒營祈禱。所以阮第一車著請減我幾個月的姊妹Joy來𤆬逐家祈禱。我是本活動錄影的人，所以我彼陣著那錄影那祈禱講：「主啊，求你賞賜阮好天，予阮的活動𣍐變來變去。哈利路亞！……」到佇活動的所在------草山的一個所在，阮著提家己的行李落車，順紲搬活動用的設備去禮堂。到禮堂，逐家攏坐落來，我徛佇尚後壁的所在錄影。拄開始欲創啥呢？著是愛請這活動的班長Tony兄弟來共逐家說明規則，伊講：「請逐家掀開手冊第二頁。逐家有看著咱的時間表無？請逐家注意，愛佇歇睏時間才會使去便所抑是食物件及啉物件。當我若歕觱仔，不管咧創啥，請停止你手做的工轉來禮堂。」講了紲落來是破冰時間，阮逐家著去禮堂外口的籃球場耍。這兩工的破冰主持人攏是Joy姊妹及阿耀兄弟。阮佇籃球場耍啥物呢？阮耍「一隻膨鼠及兩欉樹仔」。欲按怎耍？三人一組，兩人兩枝手牽做伙做兩欉樹仔；一人包佇兩人內底做膨鼠，主持人若講：「敆作師父來啊！」兩枝手牽做伙的彼兩人著愛離開去包另外一個人；主持人若講：「獵人來啊！」包佇兩人內底的彼一個人著愛去揣另外兩人予包；主持人若講：「森林大火！」所有的人著攏愛走去重組。我是負責錄影的，敢有入去耍？有，我請阿丹兄弟共我鬥錄影然後我入去及亻因耍，但我耍無偌久因為揣無人通組著失去資格，所以我著繼續錄影。耍了著轉去禮堂上課，第一堂叫「兵團選拔」，講師是本活動的班長，內容咧講有關孤兒的靈及囝兒的靈有啥無仝。老實講我心內識有孤兒的靈，特別是我非常驚別人的眼光。但是感謝主予我經歷著伊，我才知影是按怎逐工愛靈修，因為世間的物件總是會改變，只有主耶穌基督永遠攏𣍐變。所以若痴迷佇世間的物件，只要有小可仔改變，按呢絕對予人感覺家己活𣍐落去。上課了十分鐘的下課時間，阮後壁有福利社予逐家買物件食抑是耍，負責人嘛是阮教會的人。另外閣有一個箱仔及卡片，予阮寫卡片予任何欲感謝的人，寫了然後擲入去箱仔內。我寫卡片予Cynthia姊妹、Jason兄弟、Ginger姊妹、阿葳姊妹閣有博士兄弟，感謝亻因的鬥相共，我佇第一堂課敬拜中，本來拍算欲用手共三跤馬攑起來予錄影機的鏡頭通翕著臺前，感謝亻因共我鬥攑椅仔來予我會當將鏡頭用予卡懸然後輕鬆錄影。第二堂課是「兵團訓練」，講師是博士兄弟，內容是有關教會的小組。這堂課予我特別學著的是原來教會的小組並毋是團契，我來共逐家分享，組織方面，團契卡流糍，小組卡嚴密；目的方面，團契聯誼，小組增長；運作方面，團契看活動，小組看互動；功能方面，團契有限制，小組是全面的。下課了後，中晝時間到啊！阮逐家著愛去食中晝。食中晝中，我共一尾魚的魚子夾起來，阮這桌的人著叫我緊食落去，因為亻因感覺彼物件看起來足無衛生。食了下晡阮著閣去耍，耍啥呢？耍掠及閃，欲按怎耍？所有的人圍做一輾，倒手比一枝指頭仔囥佇倒手爿的人的手下跤；正手比五枝指頭仔囥佇正手爿的人的手頂面。主持人講的話中若講著「疼」，正手著愛掠正手爿的人；倒手愛閃，毋通予倒手爿的人掠著。我彼陣無耍，因為我耍過足濟擺啊！所以著決定來錄影。耍了阮著去禮堂上第三堂課，這堂課叫「兵團實戰演練」，講師嘛是博士兄弟，內容是咧講有關批評。我其實嘛足𠢕批評別人，因為我定定會為著家己的利益著去共別人嗆聲。但是當我若欲共人嗆聲的時，我心內會想著講今仔日若是我去予人按呢講，我會有啥物感覺？所以我若想欲講批評別人的話，攏用祈禱對上帝講，求上帝予我知影是彼人的毋對抑是我家己的毋對。紲落來，著是「進攻的巨人」，阮著分組去走關。總共五個關，阮這組的第一關是愛踅五輾然後關主會予阮任務；阮這組的第二關是含欶管，用欶管來傳衛生紙。阮咧耍的時陣，派阿星直直咧笑害阮逐家嘛綴伊笑，所以阮是拄仔好因為關主軟心予阮無條件過關；阮這組的第三關是「白泡泡幼糜糜」，及「綜藝大集合」這個節目的耍法差不多只不過有小可仔改變。我共球歕出去了後，著變做老人；阮這組的第四關著是愛去掠掩目睭的人，而且毋通去予伊的手巾仔捽著；最後一關著是愛去搶寶劍閣阻止關主搶著座位。耍了，阮著去食暗頓。暗頓食了，著閣去禮堂上「傳承的暗暝」的課，講員是阿霖傳道，內容是咧講有關經營教會的方法。我特別愛及逐家分享我所學著的，咱人是按怎來到地球？著是欲佇這個孤單的地球來建立及主的關係。相信主耶和華是起頭，徛起佇主耶和華的厝才是重點。閣有著是愛及逐家強調，教會欲愛的是「老實」毋是「表面」；教會欲愛的是「鼓勵」毋是「批評」；教會欲愛的是「接納」毋是「否認」；教會欲愛的是「支持」毋是「怨嘆」；教會欲愛的是「定定聯絡」毋是「干焦聚會」。下課了後，阮逐家攏準備欲去洗身軀。毋過我房間隔壁阿丹及阿耀的房間有洗身軀間，所以阮教會所有的人攏來及亻因借。
隔轉工早起，阮著先去靈修然後食早頓。食了閣是破冰的時間，這個奕只有予輔導抑是隊長出來耍，耍啥？耍「臆家己的組員」。按怎耍？隊員會對耍者講話，耍者愛臆看是啥人的聲音，若臆有毋對的，著愛用目眉寫字做處罰。想𣍐到，所有的耍者攏輸啊！紲落來是上最後一堂課，這堂課叫做「吵抐天下啦！」，講師是阿葳姊妹，內容咧講有關為主做工閣有傳講上帝的話。我欲來及逐家分享我所學著的。感謝上帝予我來到這馬這間教會聚會，因為這間教會的異象是「大大影響力的教會，大大影響力的家己」。我向望家己會當成做有影響力的人，所以感謝上帝佇2008年𤆬我來到這間教人如何有影響力的教會聚會。欲按怎做呢？第一著是聖神充滿；第二是見證上帝的作為，包括講方言、予人得著醫治、趕鬼、知影隱情、死人閣活、看見異象、講預言閣有予人領受聖神；第三點著是愛靜候主然後不斷祈禱，閣來互相相疼。上課了後著是差派禮，所有的人包括佇後臺錄影的我攏愛出來到臺前予人祈禱。差派禮結束了後，著是榮耀的時間。這擺活動的班長Tony兄弟頒一條奏餬黎都予我，因為伊感覺我佇後臺錄影非常骨力，連寫字嘛攏徛咧寫。感謝伊的謳咾，毋過其實我這兩工上課毋坐落來是欲擋家己盹龜。
這擺活動除了予我通服侍主以外，閣會當學著足濟物件。我欲感謝上帝聽阮第一工出發的祈禱，賞賜予阮這兩工的好天，予活動進行甲順利。未來閣有真濟活動，求上帝利用阮遮的少年囡仔的影響力來為主見證。咱將榮耀歸佇至懸的上帝，哈利路亞！
留言列表
