close
這條動畫電影係有關亻恩兜所搞个搞物，電影中个該兜搞物在人類無在个時節，自家會起來活動、談天等等；倒反來講，人類來个時節，搞物就愛走轉去。這系列个電影目前有三集。第一集(Toy Story)也係美國動畫電影公司-----皮克斯(Pixar Animation Studio)在1995年發个第一條動畫電影，因為該公司个頭家兼這條動畫電影个導演-----約翰拉薩特(John Lasseter)當愛收集搞物，就決定用無生命个東西來做電影。第二集(Toy Story 2)係在1999年發个第三條；第三集(Toy Story 3)係在2010年發个第十一條。
第一集正開始，有一个牧人搞物喊做胡弟(Woody)，佢係佢个主人安弟(Andy)盡愛个搞物，無論在哪位，佢等都會共下尞。
有一日，係安弟个生日，安弟收到某一個等路，佢帶等朋友到佢个房間放該等路然後離開。該等路係麼个呢？係太空人搞物，佢个名喊做巴斯光年(Buzz Lightyear)。
巴斯清醒，就對佢手腕上个對講機講：「太空總管，你好。𠊎係巴斯光年。請應話！」因為巴斯毋知佢係搞物，恅著自家係太空警察。所有安弟个搞物當欣賞佢，胡弟非常嫉妒，講：「毋信請看，𠊎還係安第盡愛个搞物。」
毋過，後來安弟摎巴斯尞个時間較多，胡弟就去摎巴斯講：「請遠離安弟，佢係1726;个主人，無人做得取代。另外還有，請毋好在講太空个東西，該分𠊎發癲。」巴斯講：「無暢做得摎太空總管提出告訴啊！」
臨暗頭个時，安第佢等準備愛去食夜，佢个阿姆單淨允准帶等一个搞物出去。胡弟趕在安弟無在个時，將巴斯踢出窗門外，因為恁樣安弟就會拿佢出門。
在加油站个時，巴斯來了，胡弟當歡喜，因為佢就做得摎安弟所有个搞物講該事係一個意外。毋過巴斯當譴，就摎胡弟相打打到車外，在該時，安弟佢等駛車仔離開，將胡弟摎巴斯拂在加油站，胡弟毋知愛仰般離開。無幾久，胡弟看著披撒星球个車，就想著做得坐該車仔去披撒星球，因為安弟佢等全家在該所在。胡弟喊巴斯，毋過因為巴斯當譴就毋想聽，所以胡弟就對巴斯講：「𠊎尋著一臺太空船了！」巴斯聽著就跈來。
到披撒星球个時，佢等在準備跳到安弟个包仔上个時，巴斯就走去夾搞物个機器裡背，胡弟在救巴斯个時，安弟屋下个壞隔壁鄰舍阿瑟(Sid)睹好來，將佢等夾走。
到阿瑟个屋下，胡弟看著佢拿等佢老妹夏那(Hannah)个搞物去佢个間肚將該搞物剁人頭換鬼頭，胡弟看著就昏忒。隔日朝晨，胡弟摎巴斯愛離開阿瑟个間肚，毋過阿瑟个搞物就來擋路，胡弟恅著佢等係壞搞物，毋過還係離開了。離開个時分阿瑟个狗阿德(Scud)看著，所以佢等就閃籬閃壁。
巴斯堵好閃狗閃到客廳，聽著電視廣告內容講：「巴斯光年請應話，這係太空總管，聽著請應話。」巴斯恅著係太空總管在喊佢，正當佢準備應話个時，電視廣告內容就接等講：「巴斯光年應講：『𠊎聽著真真。』巴斯光年，地球需要你个𢯭手。巴斯光年係一個當好搞个搞物，佢會消滅當多个壞東西，但毋係飛行个搞物，在阿兒搞物公司(Al’s toy barn)都有在賣。」
巴斯看忒後，正知佢係一個搞物，毋係太空警察，佢試著心寒。胡弟尋著巴斯，就帶等佢離開阿瑟个屋仔。
在阿瑟个間肚窗門頂，胡弟就喊對面安弟个搞物，然後將索仔拂分彈簧狗(Slinky Dog)接，毋過馬鈴薯頭先生(Mr. Potato Head)將索仔搶轉來，對安弟个搞物講：「你兜有病無？敢記得佢係仰般對巴斯？」胡弟就摎大家講：「巴斯摎𠊎共下。」毋過馬鈴薯頭先生毋信佢，所以胡弟就拿等巴斯該揇斷个一隻手來摎大家打招呼，毋過後來還係分安弟个搞物看穿了！安弟个搞物就將索仔拂忒然後離開窗門。
無幾久，阿瑟个搞物看起來像在對巴斯搞鬼，胡弟就去阻攔佢等。其實佢等在修理巴斯斷忒个一隻手。胡弟看著就摎佢等會失禮，因為佢誤會佢等。
無幾久，阿瑟就拿等佢頭先收著个東西------炸彈，佢決定炸胡弟，胡弟就閃避佢分佢尋毋著。阿瑟看著巴斯，就決定炸巴斯。該載落雨啊！阿瑟就決定天光日再來做。
下夜个時，胡弟因為在菜籃裡背，菜籃頂有器具箱，佢就喊巴斯來𢯭手，毋過巴斯講：「𠊎無能力幫你，𠊎也無能力幫任何人。」胡弟就講：「你定著係揇著頭暈腦疺了！」巴斯講：「毋係恁樣，相反過來，𠊎个頭腦頭擺恁真真，你講个著著，𠊎毋係太空警察，𠊎係搞物。」胡弟就講：「請細思量，做搞物比做太空警察好多了！當多个搞物希望做得改造成像你恁樣，因為你係巴斯光年，老實講，你係當斯文，𠊎這種搞物厲害个所在單淨會講話，安弟獨獨有你就飽足了！敢會愛𠊎？分阿瑟炸忒个人應該係𠊎正著。巴斯，毋搭𠊎，趕早離開。」
無幾久，巴斯就來幫胡弟徙開器具箱，胡弟出來無幾久，鬧鐘響了！阿瑟䟘床，就拿等巴斯準備炸佢。阿瑟个搞物出來，胡弟就拜託佢等來幫佢摎佢个朋友。到禾埕，阿瑟个搞物就避阿瑟，胡弟就睡等在附近，然後摎阿瑟講：「將手擎起來，莫發夢了！」阿瑟就將胡弟拿起來對佢講：「佢故障了！」胡弟就講：「麼人講𠊎故障呢？無著，𠊎在摎你講話，阿瑟！𠊎兜毋想分你炸、剁、亂搞。」所有阿瑟个搞物都動起來，對阿瑟抗議。胡弟繼續講：「從今以後，你愛學習愛惜你个搞物，你無做，𠊎兜都會知你任何个事情。」
阿瑟就分所有个搞物嚇走了！胡弟摎巴斯看著安弟佢等个車摎搬屋貨車開走了！就去逐貨車。逐个時分阿瑟个狗阿德看著，就分佢逐。巴斯為著胡弟，就去阻攔阿德。胡弟就到貨車上拿遙控車出來拂出車外去救巴斯，毋過所有安弟个搞物恅著佢在害人，所以就將佢拂出車外。狗仔阿德分圍困在當多个車仔中。
巴斯坐等遙控車逐著胡弟，貨車上个渦應茄搞物(Lenny)摎大家講：「大家來遽遽來看，胡弟摎巴斯坐遙控車來了！」彈簧狗就跳落去挷胡弟，毋過遙控車無電，彈簧狗無力，所以胡弟摎巴斯就無成功。該載巴斯身上个火箭炸彈無拆忒，所以就用該東西飛上天，胡弟緊張仔講：「亻恩兜會分炸忒！」巴斯講：「絕對毋會。」巴斯就將翼胛打開然後飛超過貨車，胡弟講：「亻恩兜超過貨車了！」巴斯講：「亻恩兜个目的毋係貨車。」佢等到安弟佢等个車上，安弟看著佢等，當歡喜仔講：「胡弟？巴斯？𠊎尋著了！佢等在車上。」安弟个阿姆講：「係無？𠊎講過你定著會尋著。」
聖誕節到了！安弟有當多个等路。第一個等路係馬鈴薯頭餔娘(Mrs. Potato Head)；第二個係麼个？係一隻狗仔。胡弟摎巴斯就啞口無言。
接等來講第二集。
第二集正開始，巴斯光年(Buzz Lightyear)到一個星球頂，看著當多个外星生物，就摎佢等作戰，行到終點，巴斯个敵人阿卓(Zurg)出現，巴斯因為佢就戰敗了！巴斯敢係死忒呢？毋係，該係恐龍搞物阿暴(Rex)在搞電動搞輸忒了！胡弟(Woody)在尋佢个帽仔，因為佢个主人安弟(Andy)愛帶等佢出去遶尞。
無幾久，彈簧狗(Slinky Dog)幫佢尋著啊！毋過從哪位尋著呢？從安弟个狗仔尋著个，胡弟就摎佢共下尞。無幾久，安弟來了，準備帶胡弟出去遊尞。當可惜，胡弟个手壞忒了，安弟就決定毋帶佢去遊尞。胡弟分放个所在，佢發現企鵝搞物(Wizzy)壞忒但無送去修理。
後來，安弟个阿姆在外背設立二手貨拍賣場，也來到安弟个房間看看敢有麼个搞物做得拿去賣。結果無想著企鵝搞物也分安弟个阿姆拿出去賣，胡弟看著就馬上拜託安弟个狗仔載佢去拍賣場救企鵝搞物。安弟搞物原本恅著胡弟想毋開，試著出賣佢自家。後來正知佢係去救企鵝搞物。毋過胡弟因為無揪著狗仔，就跌落去，又分一個細妹仔拿去尋佢个阿姆，細妹仔拿等胡弟問：「阿姆，𠊎兜做毋做得買？」佢阿姆就講：「𠊎兜毋愛牛子搞物。」佢就拂忒。拂到一個所在，堵好分阿奧(Al)看著，佢就決定愛買，毋過安弟个阿姆講：「敗勢，這係非賣品，吾倈仔盡愛个搞物。」毋過阿奧嗄挑挑用溜枋破壞東西分安弟阿姆分心，利用這機會偷走胡弟。
安弟个搞物就來開會，來追究問題。毋過佢兜看著巴斯無摎佢兜共下開會，後來正知巴斯所發現个線索，然後彈簧狗、阿暴、馬鈴薯頭先生(Mr. Patato Head)摎豬錢筒(Ham the Piggy Bank)就跈等巴斯去尋胡弟。
鏡頭來到，阿奧个房間。胡弟就在該位認識新搞物，包含節斯(Jessie)、紅心(Bullseye)摎阿匹伯(Stinky Pete)。為何佢兜知胡弟个名？原來佢兜摎胡弟總共四個搞物係＜胡弟牛子＞節目个主角，胡弟正知佢自家摎佢兜个關係。
直到胡弟知其實四個搞物愛送去日本東京个博物館，胡弟就摎佢兜看鞋底所寫个「Andy」，摎佢兜講真相，節斯當失望，胡弟毋知發生麼个事，阿匹伯就摎佢講：「因為𠊎兜在這位就係為著去日本，無你摎𠊎兜共下，𠊎兜就愛永遠一直在這位等待。」胡弟就摎佢兜解說原因，節斯當譴講：「聽起來安弟當愛你啊！」
阿奧轉來了！搞物就轉去佢兜原本个位仔。阿奧入來愛摎搞物翕相，無想著，胡弟个一隻手斷了！阿奧就遽遽打電話喊師傅來修理胡弟个手。阿奧出去後，胡弟發現佢个手斷了！阿匹伯就講：「修理當簡單啦！你已經當幸運了！」胡弟感覺恁樣講實在當傷心摎譴，節斯就講：「有麼个關係？反正𠊎敢講安弟盡愛搞壞忒个搞物。」
暗晡夜，阿奧在房間睡目，胡弟想利用機會來逃亡。無堵好，有搞物偷開電視來阻攔胡弟。阿奧就起來將胡弟放轉去原來个位仔，還有帶等胡弟斷忒个一隻手離開。胡弟看著遙控器在節斯个頭前，就下來摎佢詏，節斯就下來摎佢冤家，阿匹伯就來對胡弟講：「𠊎毋知係麼人做个，毋過建議你等到天光日，有師傅會來修理你个手。」胡弟接講：「然後𠊎就離開。因為安弟……」節斯講：「安弟，安弟。心肚單淨有安弟。」
隔日，師傅來到阿奧个房間來修理胡弟个手，除忒修理外，也分佢化妝，甚至將鞋底所寫个「Andy」也用油漆畫上去。阿奧當開心將所有胡弟系列个搞物拿來共下翕相。然後阿奧就離開去辦佢自家个事，胡弟就當歡喜佢个手已經修好了！毋過節斯就當譴對佢講：「無毋著，你做得離開了！」阿匹伯對胡弟講：「節斯心中有兜受傷，你在走以前看你做毋做得摎佢談天？」
胡弟去摎節斯談天，對佢講安弟个事，節斯就講：「𠊎猜想，安弟係一個當特別个倈仔，你雖然無在動，毋過佢感覺你在摎佢做朋友。」胡弟毋知為何節斯知，節斯摎佢講，正知原來節斯原本也有主人，毋過主人長大，已經毋愛節斯搞物，節斯就分佢个主人捐出去。胡弟聽忒後，阿匹伯接等講：「你愛摎安弟共下，你確定佢會一生摎你尞無？安弟會長大。」胡弟聽著後，就決定摎佢兜共下去日本。
巴斯佢兜在哪位呢？佢兜在阿奧个搞物店尋胡弟，佢兜分頭去尋。巴斯在尋个時節，看著有當多摎佢共樣个搞物，佢就去看。無堵好，佢分另外一個巴斯搞物揪著，該巴斯毋知自家係搞物，佢單淨知所有个太空警察愛歇睏，直到授權正做得䟘起來。所以該巴斯恅著安弟个巴斯違法，所以就將佢關在搞物盒仔裡肚。
其他个搞物就開搞物車去尋胡弟，毋過尋著芭比(Barbie)，就拜託佢來𢯭手。開到巴斯該位，睹睹講个另外一個巴斯睹好在該位，阿暴就對佢講佢知愛仰般打巴斯个敵人阿卓，所以巴斯就摎佢兜去。
佢兜在辦公室尋胡弟，睹好阿奧入來，佢兜就入去佢个包仔裡肚，跈等去胡弟个所在。毋過阿奧無拿包仔下車。所以巴斯就下車去查看，還有尋入口去到電梯个所在，該時安弟个搞物還毋知該巴斯毋係安弟个巴斯。到電梯該位，巴斯就用索仔爬上去。爬到半路，失去重心，巴斯就用佢个減重系統。佢恅著佢用該系統，毋過其實係電梯上來了！
來到阿奧个房間，安弟个搞物就遽遽帶等胡弟離開，結果巴斯又出現，搞物正知原來一直跈佢兜走个巴斯毋係佢兜个巴斯。毋過胡弟毋摎佢兜離開，所以佢兜就毋插胡弟了！好在胡弟看電視中有搞物摎主人个畫面，正改變心意摎佢兜轉去屋下，毋過在該時，胡弟也邀請節斯、紅心摎阿匹伯共下轉去屋下，毋過阿匹伯毋肯，也將出口鎖仔死，對佢兜講：「𠊎在搞物店一直看著所有个搞物分人賣忒，𠊎一直等待，等到今晡日，你兜做毋得打壞𠊎个希望。」
阿奧轉來，所有搞物就摎佢行，毋過可惜無跈著，所以安弟个搞物就去開披撒星球車跈等阿奧到機場。在機場，佢兜送行李个所在尋著胡弟佢兜个行李，毋過阿匹伯當譴講：「細倈人會打壞你兜，你兜有一日會拂著糞堆中。」胡弟就講：「阿匹伯，這下你愛學習享受摎細倈人共下尞个快樂。」然後就將阿匹伯放著別人个行李中。
然後，節斯摎行李共下送到飛行機頂，胡弟、巴斯摎紅心去救佢，胡弟自家到飛行機頂救節斯，本本愛從飛行機个行李門口出去，可惜門關了！胡弟就摎節斯去另外一個出口出去，睹好巴斯摎紅心來了！胡弟就決定愛跳落去，節斯恅著胡弟發癲了！胡弟就講：「詐意做胡弟牛子个結局。」節斯講：「毋過節目取消了！亻恩兜毋知做仔著無？」胡弟就講：「亻恩兜就來分佢好勢。」佢兩儕就跳落去飛行機下摎巴斯佢兜會合，然後所有个搞物就轉去安弟个屋下。 安弟轉來屋下，就看著所有个搞物已經企等共下準備來接待佢，安弟當歡喜。隔日，安弟摎全家出發去毋知哪位，所有个搞物就䟘起來，節斯摎紅心當歡喜佢兜有新个家庭了！無幾久，企鵝搞物來了！胡弟發現佢已經分人修好了，企鵝當歡喜仔想愛來開帕提。
接等來講第三集。
安弟(Andy)準備愛去讀大學，佢个搞物毋知愛做麼个呢？送分老妹？毋係，因為老妹也已經長大了！安弟伸个搞物有胡弟(Woody)、巴斯(Buzz Lightyear)、節斯(Jessie)、紅心(Bullseye)、阿暴(Rex)、彈簧狗(Slinky Dog)、馬鈴薯頭先生摎厥餔娘(Mr. and Mrs. Potato Head)、三眼怪(Three eyed alien)還有豬錢筒(Ham the piggy bank)。
有一日，安弟个阿姆愛安弟來處理房間个東西，安弟決定帶胡弟摎佢共下去大學，其他个搞物就放去儲藏室。毋過當安弟愛去放搞物个時，看著老妹需要幫助，就去𢯭手，就將搞物放在地板項。安弟阿姆恅著係糞堆，就拿等去外背放在糞堆車會收个所在。
胡弟看著就去救佢兜，毋過佢兜已經逃出來了！胡弟就摎所有个搞物說明真相，毋過搞物毋相信佢。搞物決定摎安弟老妹个搞物芭比(Barbie)共下坐安弟阿姆个車去托兒所，胡弟為著愛阻攔佢兜就跈等去。
到托兒所，安弟个搞物看仔當期待，胡弟就一直打點仔細無一定係好所在，愛有心理準備，搞物一直毋聽。到教室，搞物看著當多个細倈仔在摎搞物做朋友，就越來越期待分佢兜搞。
下課時間到，細倈仔就離開教室。安弟个搞物從箱仔出來，托兒所个搞物就歡喜接待佢兜。托兒所所有搞物个頭家劣曹(Lotso)也來接待佢兜，紹介托兒所。安弟个搞物對胡弟講：「這係好所在，你竟然愛1726;兜摎安弟共下。」劣曹就對胡弟講：「原來拂忒你兜个人係安弟啊！該係佢自家个損失。」
紹介後，劣曹就安排安弟个搞物在虐毛蟲班个教室，芭比就摎阿坤(Ken)共下去揚蝶仔班个教室。胡弟就一直摎安弟个搞物說明安弟拂忒大家這係一種誤會，毋過搞物一直毋相信佢个話。胡弟就決定自家離開托兒所，無睹好，胡弟在離開个半路仔分托兒所个細妹仔波妮(Bonnie)看著，就將佢帶轉去屋下。
然後，在虐毛蟲班教室个安弟个搞物，看著外背有當多个倈仔在排列準備入教室，安弟个搞物當期待做得摎細倈仔尞。毋過巴斯感覺恁奇怪，為何其他个搞物愛閃起來？然後，細倈仔入來，就一直對佢兜做出收拾搞物个動作。
鏡頭來著波妮个屋下，胡弟就認識佢个搞物，包含阿獅(Mr. Pricklepants)、阿白(Buttercup)、阿犀(Trixie)、多莉(Dolly)、道道羅(Totoro)、三豆仔(Peas-in-a-Pod)摎席可(Chuckles the clown)。佢兜摎波妮尞，所有波妮个搞物感覺胡弟看起來非常有經驗。
鏡頭轉來到托兒所，安弟个搞物感覺無應該在虐毛蟲班，因為倈仔年紀太輕，毋知愛仰般摎佢兜尞，應該去揚蝶仔班，而且佢兜分鎖在教室，巴斯就從氣窗出去尋劣曹講，毋過分劣曹摎佢个手下捉起來。
安弟个搞物在等巴斯个時節，馬鈴薯頭太太因為有一隻目珠在安弟个房間，佢用該目珠查看，正知原來胡弟對佢兜講个話係事實，安弟無愛拂忒佢兜。
無幾久，劣曹摎佢个手下共下來著教室，節斯講：「敗勢啦！𠊎兜愛離開了！」劣曹講：「正來無幾久為何愛離開呢？其實細倈仔當惜你兜唷！」馬鈴薯頭先生講：「惜𠊎兜？𠊎兜分佢兜欺負呢！」劣曹毋聽佢兜个話，節斯講：「𠊎愛離開了！」
結果巴斯出現，就將所有安弟个搞物捉起來，因為劣曹對佢做怪，使佢又摎第一集共樣恅著係太空警察。節斯一直話佢，巴斯就講：「恬恬！阿卓(Zurg)个手下，星球聯盟已經將你兜收押了！你兜个帝王戰敗了！」劣曹就命令巴斯將安弟个搞物鎖起來。
芭比睹好來，看著，就問阿坤，其實阿坤也係劣曹个手下。芭比當譴，就決定毋摎阿坤共下，選擇摎安弟个搞物共下受苦。
鏡頭轉來到波妮个房間，胡弟就䟘起來，波妮个搞物也䟘起來對佢講：「今晡日尞仔無歡喜無？」胡弟講：「當然歡喜，𠊎有當多年無恁樣享受了！毋過請看𠊎鞋底，𠊎有𠊎自家个主人。請問大家敢知托兒所愛仰般去？」搞物就來𢯭手。查著後，胡弟就摎佢兜講佢愛去托兒所，所有个搞物感覺恁奇怪，胡弟係仰般逃出來？胡弟毋知佢兜个意思。原來係劣曹，劣曹係歪心个搞物。
為何劣曹歪心呢？席可就摎胡弟講：「劣曹，𠊎原本係佢个好朋友，𠊎兜有同一個主人，名安到戴西(Daisy)。佢愛𠊎、大寶(Big Baby)摎劣曹，劣曹當特別。好好壞壞，𠊎三個搞物一定共下摎佢搞。有一日，戴西全家出去遊尞，在服務站食飯後，戴西睡目了！毋記得將𠊎兜帶走。過當多日，戴西一直無轉來尋𠊎兜。劣曹決定帶𠊎兜共下行轉去屋下。無睹好，赴毋著了！戴西已經有新个摎劣曹共樣个搞物，劣曹心就變了！就帶𠊎兜離開。後來𠊎兜尋到托兒所，劣曹就統制該位。」
隔日朝晨頭，胡弟就偷跈波妮來到托兒所，去到虐毛蟲班，看著所有个搞物分倈仔欺負。胡弟後背出現一个電話搞物，胡弟就問佢愛仰般逃亡。然後，胡弟就摎安弟个搞物討論愛仰般逃亡。
暗晡，佢兜就分頭逃亡還有分巴斯醒過來，毋過無睹好，佢兜用毋著，巴斯䟘起來，就對自家个無線電講：「Bitacora Espacial... Me he despertado del hiper-sueño en un planeta extraño. Estoy rodeado por criaturas extrañas, y desconozco sus intenciones.(西班牙話：星球聯盟你好，𠊎在恁奇怪个星球頂，脣項有當多个生物。)」
然後巴斯就對胡弟講：「¿Quién anda ahí? ¿Amigo? ¿O enemigo?(西班牙話：麼人？朋友？也係敵人？)」胡弟就講：「𠊎兜係Amigo(西班牙話：朋友)。」
巴斯又講：「Me debo de haber estrellado y se me ha borrado la memoria. ¿Han visto mi nave espacial?(西班牙話：𠊎應該係撞著頭那暈暈。請問有人尋著𠊎个船無？)」
後來，安弟个搞物半路仔就分劣曹佢兜發現。胡弟就去摎佢理論有關戴西个事，托兒所个搞物正知佢自家分劣曹利用，大寶就將佢拂到糞堆筒等糞堆車來收。毋過無睹好，胡弟在救卡等在糞堆筒頂个搞物个時節，分劣曹揪下去，糞堆車來收糞堆，所有安弟个搞物就跈等去。
到糞堆場，劣曹睹好摎佢兜共下，佢兜就拜託劣曹撳等鬥緊鈕，毋過劣曹毋撳，就離開，所有个搞物就準備分火燒。好在三個三目怪搞物救佢兜。
搞物轉去安弟屋下，就入去箱仔肚。胡弟後來想想，就用紙條寫波妮屋下个地址。安弟來到房間看到，就開車去波妮个屋下將搞物送分佢，然後再開車去佢个大學學校。
全站熱搜
留言列表
