7月10日下晝頭，𠊎兜就去坐飛行機從桃園機場飛到中國上海浦東機場換機，下晝17：00到上海浦東機場後，因為換个班機係在7月11日當晝起飛，所以𠊎兜就去拿行李然後去歇在中國个朋友屋下一夜。行李放在朋友屋下後，佢兜就帶𠊎兜去買包仔摎食夜。
7月11日朝晨頭，朋友就做朝食分𠊎兜食，食忒後，𠊎兜就坐朋友公司个車去機場。在機場排列个時，𠊎就想著2010上海世博會个經驗，就係在中國若有當多人排列，就一定會有當多人插列。該載𠊎兜在起飛前三點鐘就來機場排列辦事。坐飛行機到意大利个打文西機場(Leonardo da Vinci International Airport, Rome, Fiumicino)，該時係下晝18：00(臺灣時間差毋多係7月12日0：00)，𠊎兜就分民宿个人駛車仔來載去民宿个所在---蒙㐁卡斯㐁羅帝维比奥(Monte Castello di Vibio)，對機場到民宿需要兩點鐘，毋過當歡喜做得摎司機談天摎聽意大利个收音機電臺節目。到民宿該位，該所在个路當複雜，該載𠊎个頭腦好。房間看起來像王、公主、王子等等所歇个所在，當靚。行李放在房間後，𠊎兜就去附近个藝術中心屋頂食夜。
7月12日朝晨07：00(臺灣時間差毋多係7月12日13：00)，外背个大鐘鐘生分𠊎䟘床。𠊎兜就去藝術中心教室食朝，𠊎一片用電腦一片食朝。食忒後繼續用電腦，毋過因為教室愛上課，所以𠊎就一片用電腦一片摎佢兜共下上課。用到一半，竟然停電，毋過停電無幾久就恢復電力了！下晝兩點(臺灣時間差毋多係7月12日20：00)，𠊎兜就食晝，𠊎兜食意大利麵、豬腳、馬鈴薯等等，實在當好食。食忒後，𠊎兜就去歇睏到下晝四點(臺灣時間差毋多係7月12日22：00)，𠊎兜去行去山下个泅水池，毋過單淨有兩儕愛泅水，伸个人就決定去大廳。原本𠊎兜想愛去附近个大廳，想毋著司機竟然將𠊎兜載轉去民宿个所在，所以𠊎兜就去啉咖啡談天。暗晡九點(臺灣時間差毋多是7月13日03：00)，食暗後，𠊎兜就來聽演講。
7月13日食朝後，𠊎兜就坐車去咅路且(Perugia)遊街，到該位，𠊎兜就先去在該位个音樂學院參觀，堵好該位有人在練樂團，𠊎兜就跈等學院主任去聽一下。參觀後，𠊎兜就去在路中个餐廳食晝，𠊎兜食披撒。食个時節，有一位街頭藝人在附近彈吉他唱歌，堵好該位有Wifi，𠊎就用手機面書直播佢个表演。佢唱忒後，就來拜託𠊎兜分佢錢，𠊎有分佢一兜仔錢，因為𠊎感覺𠊎有錄佢表演，所以感覺應該分佢一兜仔錢。食晝食忒後，𠊎兜就去遊街。𠊎去遊衫店看敢有合適个褲仔，毋過𠊎有看無買，因為當貴。繼續遊街，遊到電梯，該毋係上下直行个電梯，係斜行个電梯，當特別。到下背，正知係捷運站，捷運也當特別，單淨一節車箱摎當細，像覽車。遊街遊忒後，𠊎兜在集合前幾分去附近个山崎路行，該位停當多機車，實在像臺灣。
7月14日朝晨到暗晡較無事，因為暗晡九點(臺灣時間差毋多係7月15日03：00)有音樂會，𠊎負責錄影。毋過當歡喜有在國外聽音樂會个經驗。
7月15日朝晨七點(臺灣時間差毋多係7月15日13：00)，𠊎兜就摎從美國來意大利參加音樂節个學生仔摎先生共下坐遊覽車去菲蓮齋(Firenze, Italy)遊街，路中𠊎兜在高速公路服務區歇睏一下，𠊎兜去便所後，就去買軟冰摎咖啡啉食。到菲蓮齋，𠊎兜就分家去自家愛去遊个所在。𠊎這群人去烏菲㐁博物館(Piazzale degli Uffizi)，裡背有當多个畫作。看忒後，𠊎兜就去遊該城市个傳統市場，該位都在買袋仔、衫褲等等，毋過無一個係𠊎愛摎需要。轉去集合个路中，𠊎兜就去超市買一兜東西，因為暗晡頭轉去民宿無東西食。轉來民宿後，𠊎兜就一片食，一片搞朋友在菲蓮齋買轉來个面具，大家搞到起笑。
7月16日朝晨八點(臺灣時間差毋多係7月16日14：00)，𠊎兜就坐車去阿西西(Assisi, Italia)遊街摎看教堂，到該位，當𠊎準備用錄影機錄影个時節，正知記憶卡壞忒了，無法度用佢來翕相錄影，該哉無在7月14日暗晡表演个時節出問題。𠊎兜去阿西西看教堂，𠊎一片看一片想基督新教个教會做得裝潢做恁樣，因為恁靚。毋過盡重要个就係做毋得迷信在聖像、牧者、壁畫、教堂等等世界个人事物。也就係教堂應該愛有一兜摎聖經故事有關个畫作。看忒教堂後，𠊎兜就去遊街，𠊎買兩個衫領仔。下晝六點半(臺灣時間差毋多係7月17日00：30)，𠊎兜就坐車轉去民宿，想毋著從美國來意大利參加音樂節个該兜人請𠊎兜去民宿附近个藝術中心食夜，原本𠊎兜恅著7月14日係最後一擺在該位摎佢兜共下食夜，毋過這擺也正係最後个食夜，因為𠊎兜隔日就愛離開民宿了！食夜後，𠊎就將7月14日暗晡表演个影片拿分來摎𠊎討影片个人，該哉記憶卡裡肚个資料做得放在電腦裡肚。
7月17日朝晨頭，𠊎兜就坐車去達文西機場送該日愛出發轉去臺灣个朋友，然後𠊎兜就坐機場捷運到羅馬(Roma, Italian)遊尞，到羅馬車站(Romatermini)，𠊎兜去摎神父會合，佢就帶𠊎兜去坐公車去旅館，這係𠊎第二擺坐歐洲个公車，上擺坐歐洲公車係七年前去西班牙(España)該擺，𠊎兜坐个64號公車路線已經有70年無變个歷史，該公車有當多觀光客，所以剪綹仔也當多。到旅館放忒行李後，𠊎兜就摎神父去附近个中國自助餐廳食晝，因為𠊎已經有當多日無食著飯，所以就食當多，食到肚痛，該哉𠊎兜繼續行就好多了！𠊎兜行到環蒂岡个聖彼得廣場(Piazza di San Pietro, Vantico)，企在某一點四面看在廣場有三支一組个柱仔，文藝復興建築物，會分你恅著係一枝一組。接等𠊎兜就去坐捷運到西班牙廣場(Piazza di Spagna)，該廣場个名係因為西班牙摎中國在該位簽建交書。帶等𠊎兜去羅馬遊尞个神父也帶𠊎兜去佢个屋下，佢个屋下當大，也有教堂。遊到差毋多暗晡七點半(臺灣時間差毋多係7月18日01：30)，𠊎兜就坐輕軌去羅馬个西門市場(Via Condotti)食夜。
7月18日朝晨頭，𠊎兜從旅館行路去聖彼得大教堂(Basilica di San Pietro in Vaticano)，該教堂實在當靚，特別係中央个祭壇。看忒後，下晝頭𠊎兜去博物館，裡背有一個所在𠊎印象盡深，就係在有拱形个禮拜堂，放在裡背天井个畫就像石像在天井頂。看忒後，𠊎兜就坐公車去古羅馬競技場(Colosseo)附近行。行去食中國餐廳食夜，食夜前，𠊎兜去超市買一兜東西。到中國餐廳，𠊎看著筷仔頂寫「福祿壽宜㝩」，就想著𠊎細人仔个時節常常拿等該款筷仔尞。
7月19日朝晨頭，𠊎兜去古羅馬競技場，該位个景實在恁靚。接等𠊎兜就坐捷運去聖保羅教堂(Basilica Papale San Paolo fuori le Mura)，在教堂外背，堵好係當晝十二點(臺灣時間差毋多係7月19日18：00)，教堂个大鐘響，當好聽。到教堂裡背，觀光客當少，分𠊎兜感受著聖靈在做工，雖然𠊎係基督新教，該係天主教堂。遊忒教堂後，𠊎就去食自助餐，該餐廳有中國菜、日本菜、東南亞菜等等當多个菜色。食忒後，𠊎兜去遊街，遊著一間店，𠊎兜就入去買尞物、袋仔、包仔等等。買忒後𠊎兜就去朋友接等愛歇个旅館寄自家所買个東西。然後𠊎兜就坐公車去阿根挺廣場(Largo di Torre Argentina)順便摎神父去見佢个朋友，佢个朋友也請𠊎兜食軟冰。接等，神父个朋友帶𠊎兜去一間教堂，堵好在祈禱，分𠊎感受著聖靈个工作。摎神父个朋友遊幾條街後，佢就去辦佢个事，𠊎兜繼續跈神父去Ristorante Macelleria這間餐廳食夜，𠊎兜食兩個大牛排，好載係共下食。
7月20日朝晨頭，神父先陪𠊎兜該儕愛坐朝晨九點(臺灣時間差毋多係7月20日15：00)起飛班機个朋友去機場，然後神父再轉來摎伸个人會合。𠊎兜朝晨頭在做麼个呢？𠊎兜先退房，行李寄在旅館櫃臺，然後去附近遊街，遊到天使城摎天使橋該位，𠊎兜看著兩個街頭藝人穿仔當特別，看起來當像看著鬼仔。遊忒後，𠊎兜就轉去旅館拿行李然後去威尼斯廣場附近个愛爾蘭餐廳食晝，食忒後𠊎摎神父去啉水談天，佢請𠊎啉可樂，其他人去買衫褲。差毋多在下晝三點(臺灣時間差毋多係7月20日21：00)，1726;兜就摎神父道別後，就坐機場个遊覽車去機場準備登機。辦登機个時節，服務人員就摎𠊎兜講坐去中國上海浦東機場，停在上海十二點鐘以上然後正換機飛去臺灣臺北桃園機場，行李無法度直掛，愛先在上海浦東機場拿出來，隔日再掛入去。
到中國上海浦東機場，係中國時間7月21日下晝三點半(摎臺灣時間共樣)，𠊎兜去拿行李，毋過既然有一個行李等兩點鐘都無出來，𠊎兜就去申報，服務人員請𠊎兜隔日再來看，若無就到臺灣个時節再看，若再無就去申報。𠊎兜等到下晝五點正坐計程車去歇在上海个朋友屋下，到該位無幾久，𠊎兜又出門去買袋仔、包仔，買恁多，暗晡九點，𠊎兜轉來朋友屋下，朋友煮一兜水餃分𠊎兜食。
7月22日朝晨八點，𠊎兜坐車去中國上海浦東機場，𠊎兜先去辦登機然後去看昨晡日無出來个行李敢有出來，毋過還係無，𠊎兜將就到臺灣再來看。到臺灣臺北桃園機場拿行李，想毋來所有个行李都出來，包含在上海一直無出來个行李也有出來，看牌仔，正知原來該儕意大利个機場服務人員將該行李打成直掛。感謝上帝分𠊎兜在上海做得省一個行李。
留言列表
