7月10號下晡，阮對桃園機場坐飛行機去中國上海浦東機場搬機，中國時間下晡五點(及臺灣時間仝款)到上海浦東機場了後，因為另外一班機是佇7月11號中晝才起飛，所以著去領行李然後去蹛佇上海的朋友亻因兜。
7月11號早起，阮朋友著做早頓予阮食，早頓食了，阮著馬上坐朋友公司的車去機場，佇機場排隊的時，予我想著去2010上海世界博覽會的經驗，著是排隊的人若濟，著會有足濟人插隊，所以好佳哉阮佇起飛前三點鐘著去機場排隊。坐飛行機到義大利達文西機場(Leonardo da Vinci International Airport, Rome, Fiumicino)，彼陣是義大利的下晡六點(臺灣時間差不多是7月12號0：00)，阮著予民宿的人駛車來載阮去民宿的所在---蒙堤卡斯堤羅迪维比奥(Monte Castello di Vibio)，對機場到遐差不多開兩點鐘的時間，毋過嘛正歡喜予阮會當及司機開講以及聽義大利的落而喔電臺節目。到民宿遐，彼爿的路有夠複雜，好佳哉我的頭腦好。房間看起來足成王、公主、王子等等蹛的款，有夠水。行李囥了，阮著去藝術中心的厝尾頂食暗頓。
7月12號早起07：00(臺灣時間差不多是7月12號13：00)，我去予外口的鐘聲吵起來，好佳哉有彼，所以才有法度卡早起床。早起08：30(臺灣時間差不多是7月12號14：30)阮著去藝術中心的教室食早頓，然後我那食那用電腦。因為電腦的代誌猶未處理好，所以著佇教室咧上課的時陣繼續用電腦。毋過用到一半，煞停電，好佳哉無外久著恢復電力啊！下晡兩點(臺灣時間差不多是7月12號20：00)，阮著食中晝，中晝除了有義大利麵，閣有美國蕃薯、豬跤等等，足好食。食了阮著去睏晝睏到下晡四點(臺灣時間差不多是7月12號22：00)，阮著做伙向山跤的路行去，去泅水池，毋過阮干焦兩人欲泅水，賰的人想講敢有大廳會使坐，所以泅水池的人著請一位司機載阮去，想𣍐到既然是載阮轉來到民宿遮，所以阮賰的人著去啉咖啡開講。暗時九點(臺灣時間差不多是7月13號03：00)暗頓食飽了後，阮著來聽演講。
7月13號早起早頓食了，阮著坐車去柏呂遮(Perugia)踅踅行行。阮早起10：00(臺灣時間差不多是7月13號16：00)到柏呂遮，著先去參觀音樂學院，拄仔好內底有人咧練樂團，阮著綴主任入去聽一下仔。參觀了後，阮著去路邊的餐廳食中晝，阮食披撒。食飯時，拄仔好有街頭藝人佇邊仔咧彈吉他唱歌，拄仔好遐有Wifi，所以我著用手機來面冊現場轉播。彼人表演了，著來拜託逐家予伊錢，我想想著感覺應該予伊，因為我想講我共伊錄影，所以著決定予伊一寡錢。食飽了後，阮著去踅街，我去踅衫店看敢有適合我的褲，尾仔嘛揣無適當的褲，因為傷貴。繼續踅街，踅到一個電梯，彼電梯足特別，毋是普通的直直向頂懸下跤行，是小可仔崎的電梯，足特別。坐電梯到樓跤，才知影樓跤是捷運站，這捷運的車嘛足得別，車箱一節閣足細臺，成遊籠。踅了，阮佇集合時間的前幾分鐘去附近的山路遐行，山路崎路頂停一大堆奧多䆀，足成臺灣。
7月14號早起到暗時，攏卡無啥代誌，因為暗時九點(臺灣時間差不多是7月15號03：00)是音樂會，我干焦負責錄影，毋過真歡喜有佇外國聽音樂會的經驗。
7月15號早起七點(臺灣時間差不多是7月15號13：00)，阮及對美國來義大利參加音樂節的學生及教授做伙坐遊覽車去菲連濟(Firenze, Italia)踅踅行行，路中阮佇高速公路服務區歇睏一下，阮著去便所了後，著順紲去買冰淇淋及咖啡來啉食。到菲連濟，阮著分攤去踅。我這陣是去宇費提博物館(Piazzale degli Uffizi)，博物館內底攏有足濟畫作。踅了，阮著去遐的傳統市場踅，遐攏是咧賣袋仔、衫仔褲等等。毋過無一項是我甲意的。轉去集合路中，阮去超市買一寡物件，因為轉去民宿遐無暗頓通食。阮坐遊覽車轉來到民宿，著先食暗頓，食暗頓的時間，阮那食那耍朋友佇菲連濟買轉來的面具，阮逐家提彼來翕相翕到起笑。
7月16號早起八點(臺灣時間差不多是7月16號14：00)，阮對民宿坐車去阿司司(Assisi, Italian)踅規工，到遐當欲用錄影機錄影時，才知影記憶卡歹去啊！所以著無法度用彼翕相錄影，佳哉無佇7月14號暗時的表演出問題，感謝主。阮去阿司司踅街及看教堂。教堂攏正水，毋過心內著咧想講其實基督新教的教堂嘛會當裝潢遮爾仔水，毋過尚重要的是毋通予人迷信佇聖像、壁畫、教堂、牧者等等世界的人事物頂。算講著是至少教堂有一寡有關聖經故事的畫。看了教堂了後，阮著去踅街，我去買著兩領衫。下晡六點半(臺灣時間差不多是7月17號00：30)，阮著坐車轉去民宿，想𣍐到對美國來義大利參加音樂節的彼陣人欲請阮去民宿附近的藝術中心食暗頓，阮本來叫是7月14號的暗頓是最後一擺佇遐食，想𣍐到這工閣會使去遐及亻因做伙食暗頓，嘛真正是最後的暗頓，因為阮隔轉工著欲離開民宿啊！暗頓食了，我著去將7月14號的表演影片傳予揣我討影片的人，佳哉記憶卡的資料會當囥入去電腦。
7月17號早起，阮著坐車去達文西機場送這工欲出發轉去臺灣的朋友，然後閣坐捷運去羅馬(Roma, Italian)𨑨迌，到羅馬車站(Romatermini)，阮著及神父會合做伙坐公車去阮的旅館，這是我第二擺坐歐洲的公車，頂擺佇歐洲坐公車是七年前去西班牙(España)彼擺。阮坐的64號公車是一種路線70年來無改變的路線，這臺公車是有足濟觀光客，所以飛鼠會卡濟。中晝十二點(臺灣時間差不多是7月17號18：00)到旅館囥行李了後，阮著參神父去食旅館附近的中國自助餐廳食中晝，因為足濟工無食著飯，所以我著食足濟食到腹肚疼，好佳哉阮食了繼續行著好真濟啊！阮行去到梵蒂岡聖彼得廣場(Piazza di San Pietro, Vantico)，這嘛是我第一擺行路跨國，彼所在有一個點，人若徛佇遐四面看有三枝柱仔一組的文藝復興式建築物，看起來攏干焦一枝柱仔。紲落來，阮著坐捷運去到西班牙廣場(Piazza di Spagna)，這廣場的名是因為西班牙及中國簽建交的所在佇遮，所以才會按呢號。𤆬阮𨑨迌的神父嘛𤆬阮去亻因兜坐坐，亻因兜足大，閣有教堂。踅到差不多暗時七點半(臺灣時間差不多是7月18號01：30)，阮著坐輕軌去羅馬的西門町(岡多池路，Via Condotti)食暗頓。
7月18號早起，阮對旅館行路去到梵蒂岡的聖彼得大教堂(Basilica di San Pietro in Vaticano)，彼教堂內底的有夠水，特別是中央的祭壇，看起來足成電動內底的景。看了，下晡著去博物館，內底予我印象尚深的是禮拜堂，遐𣍐當翕相錄影，毋過內底的畫佇教堂拱形的天蓬，看起來足成雕像掛佇天蓬頂。阮著坐公車去古羅馬競技場(Colosseo)附近行行。行去食中國餐廳，食暗頓進前，阮先去超市買一寡物件。到中國餐廳，一看著箸，著想著以前細漢囡仔的時陣定定提來耍的箸，因為箸頂寫「福祿壽宜康」。
7月19號早起，阮去古羅馬競技場。紲落來阮坐捷運去聖保羅大教堂(Basilica Papale San Paolo fuori le Mura)，佇教堂外口，拄仔好中晝十二點(臺灣時間差不多是7月19號18：00)，教堂的大鐘開始霆，足好聽。入去教堂內底，觀光客足少，予阮感受著聖神咧做工，雖然我是基督新教徒，彼所在是天主教堂。踅了教堂，阮著行去食自助餐，彼餐廳有足濟國家的菜，有中國菜、日本菜、東南亞菜等等。食了阮著去踅街，踅到一間店，阮著入去買𨑨迌物、袋仔、扣茫等等。買了阮著去朋友紲落來欲蹛的旅館寄一下仔阮買的物件，然後才閣坐公車去阿根廷廣場(Largo di Torre Argentina)順紲參神父去見伊的朋友，伊的朋友閣請阮食冰淇淋。紲落來，神父的朋友𤆬阮去一個教堂，拄仔好教堂當咧祈禱，予我感受著聖神咧做工。及神父的朋友行幾逝路了後，伊著去辦伊的代誌，阮繼續綴神父行去Ristorante Macelleria這間餐廳食暗頓，這頓阮點兩個足大塊的牛排，好佳哉是公家食。
7月20號早起，神父先去陪阮彼位欲坐早起九點(臺灣時間差不多是7月20號15：00)起飛班機的朋友去機場送伊，然後神父才對機場倒轉來及阮賰的人會合。阮早起欲創啥呢？阮著先退房，行李寄佇旅館櫃檯，然後去附近踅踅行行，踅到天使城及天使橋遐，阮看著兩個街頭藝人穿甲足特別，看起來真正足成看著鬼。踅了阮著轉去旅館提行李然後去威尼斯廣場附近的愛爾蘭餐廳食中晝，食了我參神父做伙去啉茶開講，神父請我啉可樂，其他的人去買衫。差不多到下晡三點(臺灣時間差不多是7月20號21：00)，阮著及神父道別然後坐機場的遊覽車去機場準備登機。辦登機證及掛大行李的時，服務人員著及阮講坐去中國上海浦東機場，停佇上海十二點鐘以上然後才搬機飛轉去臺灣臺北桃園機場，行李無法度直掛，愛先佇上海浦東機場領出來，隔轉工閣去浦東機場掛入去。
到中國上海浦東機場，是中國時間7月21號下晡三點半(及臺灣時間相仝)，阮著去領行李，毋過行李既然賰一箱等一兩點鐘等無，阮著趕緊去申報，服務人員著叫阮隔轉工才來看覓，若無著是到臺灣臺北桃園機場等看覓，若閣無著閣去申報。所以阮等到差不多下晡五點才坐計程車去蹛佇上海的朋友亻因兜，到遐無偌久，阮著閣出門去買扣茫、袋仔，買一大堆，暗時九點，阮轉來到朋友兜，朋友著煮一寡水餃予阮食。
7月22號早起八點，阮坐車去中國上海浦東機場，阮先去辦登機證及掛大行李，辦了順紲去問看頂一工無提著的行李敢有法度領出來，毋過嘛是無，所以阮著規氣到臺灣才來看覓。到臺灣臺北桃園機場了後，著去領行李，想𣍐到所有行李攏領出來啊！阮看彼個一直領𣍐出來的行李頂的牌仔，才知影原來彼位義大利的機場服務人員共彼個行李拍直掛。真感謝主予阮佇上海會當省拖一個行李。
留言列表
