2014/08/11中晝，阮兜坐火車去花蓮市(Hualian, Taiwan)。拄到的時，阮著先去阮佇網路訂的力麗哲園(Lik-Le Garden Hotel)，這間飯店外觀足成高級人家，中央閣有深井。阮來到這間旅館共行李囥好了後著去稅車。下晡16:30，阮駛車去買烰卵蔥油餅，足好食。暗時阮去食花蓮名產---扁食，紲落來閣行路踅踅，踅去買蚵仔煎、肉丸及薁蕘，買了繼續踅，踅到牛奶店，著入去買瑞穗牛奶。買了阮著轉來旅館食所買的物件。這暗的暗頓正好食。
2014/08/12早起，阮退房了後著駛車去瑞穗牧場(Sui-sui Range)，佇遐我看著鴕鳥及牛仔，著去及遐的動物翕相。阮嘛順紲買牛奶、義式式牛奶布丁、熾斯雞卵糕及饅頭來啉閣食。紲落來阮去六十石山(Sixty Stone Mountain)食中晝閣踅踅行行，彼所在的風景足水，有一片地攏是金針。下晡15:30，阮著駛車去石梯坪(Chioh-Thui-Penn)。佇路中，阮經過北回歸線、沙漠風情民宿等等。沙漠風情的景正水，推薦大家來遮蹛。到石梯坪，彼所在除了有民宿以外，閣有予人露營的地，若欲辦活動建議來遮辦。阮到一粒大岩石頂，彼所在足成咧攀岩但海景真水。紲落來阮著駛車去彼暗欲蹛的民宿---聲子藝棧，這間民宿一樓有足濟藝術品，房間的眠床閣是兩層的，看起來足成大學宿舍。阮囥好行李著去食暗頓閣有欲一寡物件轉來房間食。我特別有印象的店是管仔飲料店，這間店的飲料是對管仔出來的，正趣味。
2014/08/13早起，阮去食尚玩家所推薦的錢記早點買早當，實在是足好食，我嘛推薦逐家來食這間。買了阮著去舊年11月教會敬拜團退修會識去參觀的基督教花蓮博愛浸信會。紲落來，阮去林田山林業文化園區。彼所在的厝足成日本的庄跤，遐嘛有一間破厝。阮看了紲落來著去彼暗欲蹛的花蓮觀光糖廠日本式木厝，這所在嘛成日本庄跤，而且閣會使入去蹛，房間內底閣有和服，看起來足成去日本𨑨迌。
2014/08/14早起06:30，阮騎跤踏車去前日去的馬太鞍。到遐阮著予跤泡溪仔水，水有夠冰，阮嘛閣有去飼魚仔。紲落來阮退房了後，著駛車去鯉魚潭看薑母鴨，原來遐不止一隻大隻的，邊仔閣有足濟細隻的，遐嘛會使坐跤踏船。最後一個所在，著是七星潭，遐是一堆石頭的海岸，這嘛是我第一擺用家己的目睭看著這種景。
留言列表
