這擺个退修會係全教會會友包含兒童都來參加，而且有分兒童區摎大人區。小學以下个人去兒童區；國中以上就去大人區。兒童區聽劉利未傳道講道；大人區聽張哈拿牧師摎蘇義德牧師講道。𠊎兜退修會來到新北市萬里區个太平洋翡翠灣溫泉渡假飯店。
2015/05/02𠊎兜坐車來到飯店，朝晨10：00就來聽張哈拿牧師講道。這場講道𠊎摎大家分享，所有會用聖經个話來講話个人無一定會得救，守阿爸上帝个旨意正會得救；二，教會毋係單淨一個所在，係聖靈充滿个教會，而且也係充滿上帝个話个所在；人絕對毋係因為自家个優點發光，係靠耶穌基督个光發光；愛因為上帝歡喜，做毋得因為世界來歡喜。
下晝頭𠊎兜去海邊遊尞，該所在像希臘，做得敲鐘。差毋多在15：30，𠊎兜教會會友就去領房間个鎖匙。
暗晡頭𠊎兜又來聽張哈拿牧師講道。這場𠊎愛來摎大家分享，屬靈个低頭族係麼个？就係單淨看環境个人；當亻恩兜堵著任何个事，無論好也係壞，就仰般祈禱：「阿爸上帝啊！感謝你分𠊎堵著……，𠊎愛在……學到……，𠊎愛克服……。奉主耶穌基督个名來求。阿門」另外還有愛摎大家分享，任何事若無照你个意思來發生，可能有較大个祝福在等候你去接受，也有可能係自家愛改變自家个想法。最尾𠊎愛摎大家講，惡鬼撒旦所設个計絕對係喊人在恩典中奢鼻，分人恅著自家比任何人較知聖經。
2015/05/03朝晨09：00，𠊎兜食忒早退房後，就來聽張哈拿牧師講道。這場𠊎愛摎大家分享，教會無論分聖靈充滿幾多，愛逐日為教會祈禱。因為聖靈充滿緊多，緊係惡鬼撒旦个目標。教會有信徒摎門徒，門徒為阿爸上帝做事，信徒為門徒祈禱。門徒摎信徒都愛互相扶持。
食晝後下晝13：30，𠊎兜就來聽張哈拿牧師个丈夫---蘇義德牧師講道。這場𠊎愛摎大家分享，阿爸上帝毋愛分人沉淪，係喊所有个人改過。所以亻恩兜無需要為著自家个罪來驚上帝，無論犯幾多罪，自家知毋著就遽遽改過，做毋得閃避。𠊎也愛摎大家講，人个舌嫲係罪个根源，所以絕對做毋得講害人个話。最尾𠊎愛摎大家講，若有感動愛傳福音个人，毋使等啊！遽遽去做。絕對做毋得嫌自家對聖經毋罅清楚也係自家个口才毋罅好。若有感動愛傳福音就遽遽去做。
退修會差毋多在15：00結束。毋過𠊎全家摎一兜敬拜團个兄弟姐妹嗣在萬里附近摎基隆尞，直到食暗後正轉去。
留言列表
