7/4~7/7，我去參加2016 Revival Summer Camp。佇活動開始的前一暗，因為睏𣍐去，著決定來半宵祈禱，我一直咧為這活動祈禱，包括天氣、合作、互相相疼等等，祈禱到差不多透早三點才睏去。
第一工(7/4)中晝，阮教會著做伙出發去桃園市中壢區的中原大學參加2016 Revival Summer Camp。到遐了後，阮著先去報到及去家己蹛的房間囥行李。我蹛男宿舍的四樓，房間內面是眠床佇頂懸，下跤是桌仔，而且若欲⻊百去眠床，著愛提房間內底的樓梯鉤佇家己的眠床然後才⻊百去。
行李囥了，阮著去會堂及家己區的人熟似，這擺分區及頂擺佇二月的2016 Revival Winter Camp仝款嘛是分紅色區、柑仔色區、黃色區、青色區、藍色區及茄仔色區，然後每一區有分四組。 熟似了後，阮著馬上及家己的組去耍過關奕。我卡有印象的關是「我尚搖嬌」，這奕我識看過電視節目識耍過，毋過嘛是愛家己真正體驗過才知影按怎耍。我本來叫是愛大力搖矸仔，但事實上是愛沓沓仔來，若無珠會彈起來，時間著會拖著。耍了奕了後，阮著緊去洗身軀及食暗頓。
紲落來著是聚會一，這場聚會的講道請著張牧師，主題是「你敢有啥物特色？」。這場講道予我知影人的信心是看會著、基督徒毋通做007(祕密情報員)、上帝可能已經予人的恩典但人無咧用，親像手機的APP囥足濟但家己攏無咧用。我嘛佇講道中知影教會有可能會有足濟𣍐古錐閣問題濟的人。
第二工(7/5)早起十點到十二點是聚會二。這場請著呂傳道來及阮分享「囝兒的心」。這位傳道正趣味，伊嘛識耍過「小朋友落樓梯」及「小朋友上樓梯」，所以伊少年時為著欲讀冊，著愛克服遮的引誘。這場講道予我知影「律」的定義是長閣𣍐變的物件。人人攏是有兩個「律」咧對抗。耶穌的死予罪的權柄消滅，耶穌的閣活予新的贏過罪。世間充滿父母囝兒間的敵對，因為魔鬼知影只要予人的心及父母遠離，著有法度阻止人及天父上帝建立關係。最後呂傳道講道了唱應答詩歌時，我不斷咧流目屎。
食中晝了後，阮著來耍足刺激的奕---全員逃走中，這奕的規則及電視節目差不多。阮是所有的人尻脊骿攏會貼紙，然後獵人負責提水銃射參賽者尻脊骿頂的紙閣有用水桶潑水。參賽者愛負責揣寶藏及覕獵人，而且是規組行動毋是規區。每一組有三個人愛來做公主的角色，公主仝款嘛是負責揣寶藏，但公主毋通去予獵人射著，若尻脊骿的紙規張澹漉漉，公主著出局而且𣍐使繼續耍。賰的參賽者是啥呢？著是負責做公主的保鏢，予伊毋通去予獵人射著。我感覺我卡無咧揣寶藏，我卡是咧保護公主的安全。這奕會使予阮體驗大人物的生活。
耍了全員逃走中了後，著馬上去中原夜市耍食字路口。這奕是啉食接龍，接著的物件著愛去夜市買然後翕相傳Line予關主看。
暗時七點是聚會三，這場請著佇印度裔的Garrick傳道來分享「尾世英雄」。伊的分享予我知影Hollywood及Bollywood對英雄的定義無仝，前者是感覺有超級氣力的人才是英雄，後者是戇人才是英雄，因為勇敢講出家己的弱點。伊嘛講著人的曠野，上帝的呼召；人的驚惶，上帝的武器；人的軟弱，上帝的聲音。
第三工(7/6)早起八點半，阮這區著開始排暗時聚會五的戲，我是佇阮這區的戲劇組，彼時嘛毋知影我會當做啥，著綴及我仝教會的人做伙去跳開場的軍隊。早起十點到十二點是聚會四，這場請著嚴傳道來分享「佇主內面的辦法」。這場予我學習著屬神的啥物年歲需要記得的啥物代誌。屬神的囡仔，譬喻拄信主的人，愛會記得家己是去予主救的罪人；屬神的少年人，愛知影家己因為主著已經贏過惡者；屬神的成年人，愛繼續認識主毋通暫停。
中晝食了，阮著來排戲。本來我是干焦跳開場的軍舞，尾仔因為舞團遐需要一寡人，亻因看我跳正好，著問我敢會使去支援舞團，我小可仔想一下，最後著答應亻因。所以我變做軍團兼舞團兩個任務，雖然真忝，但是我感受著是上帝的祝福。本來叫是家己無法度做啥，但想𣍐到上帝著予我兩項代誌做，真正愛感謝主。
最後一工(7/7)早起，阮款好行李退房了後，著去聚會六，這場著請著四個查埔傳道接受柳牧師的訪問，親像談話節目。 這擺營會真感謝主有聽阮的祈禱，予風颱佇阮活動結束了後才來。閣有著是佇敬拜咧唱慢歌的時，我一攑手，手著不斷咧振動來振動去，可能著是聖神的恩膏足強的關係。真感謝主予我機會參加這活動閣領受真濟。將榮光歸佇主，阿門。
留言列表
