2015/07/11,𠊎兜教會下晝頭14:00共下去坐火車花五點鐘个時間從臺北車站坐到嘉義車站然後坐客運到嘉義中埔个中埔福音中心。到該位後,𠊎兜就在食暗个時節摎從美國來个STM互相相識。毋過𠊎係總務組个人,愛幫活動準備東西,所以該日較無機會摎佢等聚會。
2015/07/12朝晨頭10:00,𠊎兜就來一樓做禮拜,該聚會𠊎學習到原來上帝係行棋仔个棋手,亻恩兜人類係棋子。人做毋得做棋手,因為會行毋著路。下晝頭𠊎兜祈禱个時節,𠊎有一個感動,就係中埔福音中心未來會添加,這係𠊎自家个感動。世界當細毋過奇妙,該日𠊎正知中埔福音中心有負責人識𠊎个表舅;還有STM个人摎𠊎个歇在美國个表妹同教會,真係奇蹟。
2015/07/13朝晨頭08:30,𠊎兜就共下來讀摎分享約書亞記第三章摎第四章,讀這經節後,𠊎看著一個異象。經文中講著約旦河係一個考驗,𠊎有一個感動。請問有人去過約旦死海無?該係無論你有幾重,絕對毋會沉水。人生為著目的堵著任何考驗,就像企在約旦死海个一片,若係上帝,就會摎亻恩兜講:「毋使驚,因為這死海絕對毋會分你沉水。」若係鬼神,就會摎亻恩兜講:「既然係死海,你落入去水中一定會死。」所以亻恩兜愛逐日讀聖經摎祈禱,正毋會企在約旦河个一片,麼个東西得毋著。接等,朝晨頭09:30去中埔國小色多教室摎試尞界母,𠊎在脣項錄影。錄影个時節,𠊎也摎一個姊妹談天,該時𠊎正知𠊎在2000年6月底去過美國紐澤西个CCCNJ教會,該姊妹摎𠊎講:「莫怪你當熟面,𠊎應該看過你。」世界真係細毋過當奇妙。下晝頭𠊎在房間歇睏,無摎佢等去尞飛盤,因為𠊎愛處理影片。該載𠊎無摎佢等去尞,因為該日下晝頭17:30,嘉義中埔落大雨。
2015/07/14朝晨頭07:30,𠊎兜就來讀摎分享約書亞紀第七章。讀後𠊎有一個感動,為何做毋得偷東西?因為除忒害著別人,也會害著自家。萬一偷著个東西係炸彈、假錢、毒品等等害著自家人生个東西。朝晨頭09:00,𠊎兜就去中埔國小帶小朋友,佢等个英文比𠊎兜想像个厲害。暗晡19:30,𠊎兜在福音中心開檢討會,開到22:00。
2015/07/15朝晨頭07:30,𠊎兜短宣隊就來共下分享約書亞記第八章。讀忒後,就來分享在營會中應滅个東西,𠊎應滅个東西係情緒、驚怕等等。朝晨頭10:00,中埔國小个小朋友就來選課,這係佢等第一擺體驗選課,佢等選課選仔當狂。下晝頭17:30,𠊎𢯭手去買大家食暗个東西。
2015/07/16這日較無麼个好講个,毋過好尞个係走運動場比賽,除忒係小朋友愛比外,𠊎兜先生也愛比。總係,輸贏無重要,重要个係敢有完成。毋過今晡日當感謝上帝,中埔鄉中埔村長分𠊎兜包仔摎豆漿也係奶茶。該日,𠊎較𤸁,因為愛做營會个回顧營片,做到寅時03:00。
2015/07/17,該日,細人仔愛上棚也係跳舞,佢等當愛跳一首英文歌「Give me oil in my lamp」,𠊎也當愛這首毋過𠊎愛幫營會錄影,所以無法度摎佢等跳。細人仔个營會最後,大家就來尞水球。
2015/07/18,這日雖然係𠊎兜短宣隊个最尾,毋過𠊎兜在前一日有邀請一兜細人仔來參加。佢等尞尋寶尋到福音中心,𠊎兜先生就摎佢等共下來談天。到當晝,細人仔个阿爸阿姆載轉去屋下後,𠊎兜教會就摎STM共下來翕相做紀念。然後𠊎兜教會就去嘉義車站坐15:20个火車轉去臺北。STM去哪位呢?佢等愛去鹿草福音中心服事。
感謝上帝分𠊎機會參加短宣,分𠊎機會為大家做影片還有摎STM共下。將一切榮光歸分至高个上帝。阿門!