2014/07/04𠊎兜教會學生區，包涵國小生、國中生、高中生、大學生摎研究生，在教會準備出發去新北市貢寮區个龍門渡假基地參加𠊎兜教會所辦个夏令營------青春遠征隊。到龍門渡假基地个時，𠊎兜尞兩個界母，第一個係紹介自家；第二個係配合第一個，當𠊎兜互相相識後，就將索仔拂分想愛个人，有一儕毋使拂但愛睡在索仔所圍成个網仔頂，五秒後無跌下來，就贏了！接等𠊎兜尞「阿伯阿伯生出來」，愛仰般尞呢？分兩隊，就像有十九儕，所有个人愛講「幾儕阿伯」，講到「十九儕阿伯」个人就輸忒了！有當多人同時講，該兜人也係輸忒了！輸个人就愛將水倒在杯仔裡肚，若湓出來該隊就輸忒了！尞忒後，𠊎兜就食晝，食晝後下晝頭14:30，𠊎兜就尞「全員大逃亡」，該係學日本个電視節目，平常𠊎兜獨獨看，這下就做得實際尞。尞前，所有个隊長愛摎關主建立Line个小組，尞个人離開三十分後，關主會傳信息分隊長知獵人已經出來撮人。𠊎兜个隊閃在當遠个所在，有一細妹仔隊閃在便所，因為佢知當多獵人係細倈仔。無幾久，關主喊𠊎兜轉去會場，因為佢愛改變尞法，就係限制範圍。當好尞个界母。尞忒食夜後，𠊎兜就去尞過關个界母，𠊎試著盡有印象个係第六關，該个尞法係請一儕聽音樂；另外一儕問聽音樂个人問題，考驗聽力。
第二日(2014/07/05)朝晨頭，𠊎兜去跳塔。𠊎原本無愛跳，因為驚腳膝頭會抺傷。毋過𠊎看第一個人跳，𠊎就改變心意了！跳个時節，跳落去个感覺當恐怖，所以𠊎就大聲喝，當多人對𠊎个喝聲印象深刻。下晝頭食忒晝後，就來聽外教會个人講道。𠊎正開始聽著佢講Nokia公司，𠊎就想著恁久無聽著該公司，為何呢？等一下𠊎會講。佢講亻恩兜人愛超過四條界線，第一條係毋知个線，就像亻恩兜毋知結果，就毋敢做；第二條係無可能个界線，Nokia公司个頭家就係無超過該條線；第三條係得著人个稱讚，𠊎目前無超過這條線，𠊎會努力超過；第四條係分世界牽挷，𠊎在細倈時節做過當多个壞事，當𠊎突然間改善个時，同學就會講：「你敢毋係當會打人摎罵人？𠊎愛你做，因為你做仔像男子漢。」鬼怪就會利用該兜人講个話將人倒轉去罪中。所以亻恩兜愛「做無做過个，做毋敢做个，做無想做个。」獨獨係著个事，就愛強迫自家做著，做毋得放棄。食夜後，𠊎兜就請𠊎兜教會敬拜團團長來講道。講道後，𠊎兜教會个祈禱團隊就來幫𠊎兜祈禱，𠊎行去分一儕兄弟祈禱个時，佢講：「𠊎看著一個異象，你就像在研究一張建築藍圖，但無進入下一步。」𠊎分佢祈禱後，正知𠊎常常在想來想去，但無行動，求上帝賜分𠊎智慧分𠊎做得行動。
第三日(2014/07/06)朝晨頭係主日禮拜。禮拜後，食忒晝後，受洗禮个兄弟姊妹就去摎傳道摎輔導上課，伸个人就自由活動。下晝頭14:30，𠊎兜就行去海脣。感謝上帝有十四儕愛來受洗禮。
受洗禮个人愛企一排分牧師問佢等問題，問忒就去水淺个所在受洗禮。平常个時𠊎獨獨看著點水禮，該擺係𠊎頭擺看著浸水禮。洗禮後，𠊎兜就去尞水，尞仔當躁。尞水後，𠊎兜大家就去洗身。暗晡18:00，𠊎兜就來食炙肉。食夜後，就係營火活動，逐一隊个隊長摎輔導愛將手中个火把拿去放在中央个骨架上。所有隊放忒後，大家就來跳火舞。大家盡躁个動作，就係企在外圍个人將手牽等，然後走向內圍个人踢佢等。
最尾日(2014/07/07)朝晨頭，大家在整理行李準備轉去。這日集合時間在朝晨頭10:30，所以有當多人昨暗晡當晚睡，毋過𠊎兜當早起來，所以同工就去買東西分𠊎兜食朝。
這擺个福音營分𠊎感受著復興个開始，十四儕受洗禮个人中有一半儕係頭擺來教會參加活動，佢兜頭擺來就決定愛受洗禮，轉來著教會後，有兩儕正受洗禮个也決定愛加入敬拜團服事上帝。亻恩兜个上帝真奇妙，亻恩兜將榮耀歸分至高个上帝，哈利路亞！
留言列表
